雅虎香港新聞 爆一爆｜福臨門股神一注贏開巷 新哥傳奇（Louise）
大市回調，不過隻中移動（0941.HK）依然企得住$70，令我諗起以前在富豪飯堂福臨門，專門招呼濶佬嘅新哥（袁奕新），即管call佢講下股票。
美股外幣即時報價 多國新聞任睇
280蚊沽阿里換馬中移動
已退休年多時嘅新哥，一聽到講股票，本來手揸住生果都立即去洗手，再攞起電話侃侃而談。喺福臨門呢啲「英雄地」，見得商界猛人說話都有番咁上下功架，不過又抵佢招積，記得疫情期間喺灣仔福臨門食飯時，佢透露自己喺 $280蚊沽阿里巴巴（9988.HK） 繼而將資金押注中移動（0941.HK），就連富豪二世祖都特意去食飯聽佢講股經。
新哥話：「 呢隻股票長揸長有，越揸越有，股票唔係炒嘅，我係價值投資，我揸三隻股票咋，中移動佔七成。佢賺一蚊就派七毫半子息，呢三年仲係保證派，我將兩年收咗股息，買咗層樓俾個仔咯 ！揸住佢，我一年收二、三百萬息， 做個永久嘅CEO ，啲上市公司嘅CEO一年都係咁上下人工。」
新哥兩年多前，係$41、$46及$50分段掃入中移動。佢話自己係「逆向價值投資」，意思係 「買佢既價值」。新哥解畫：「中移動97年$12蚊上市，咁多年以來已經派咗六十幾蚊嘅股息，長期持有佢咪一路收息囉，去到2027年即係上市30周年，我相信佢會派埋特別股息㖭，上返$86唔難。嗱，6月6日就除淨，每股派$2.4，到6月29日就派到手，股息夠我日常啲使費啦！」估計新哥手頭上中移動市值起碼4000萬。
港股夠平就有人買
本週三傾談時，大市續調整，新哥對後市仍看好。「你睇今次調整同往年唔同，五一大陸放假嗰幾日，股市都照升，呢啲喺外資嘅錢入嚟，外資未賺夠水位未走得。正所謂現實就係價值，平就有人買㗎喇。你睇Dow Jones個PE 22倍，恒指得9倍。我估年底恒指去到22800點。」
另外佔新哥兩成股票嘅係盈富基金（2800.HK）。新哥話：「我係2022年11月3日，係$48沽咗兩萬股中移動，套來買當時好低殘嘅盈富基金，喺$15.84至$17.8入貨，我都叫啲朋友買盈富，今日$18.5買，去到$22都有成20%升幅，去到11月仲有六毫子股息。」
至於另一隻股票係阿里巴巴（9988.HK），新哥話：「佔我好少啫，輸哂都唔肉痛。科技股冧落嚟守唔到㗎！」新哥由一個揸鑊鏟廚房佬，晉身為專招呼富豪既樓面，見盡唔少富豪嘅起落甚至落難，最難得冇落叠去買妖股以小搏大，反而忠於價值投資，封佢為「福臨門股神」都不為過。
