狄易達隨時翻撻陳曉華 錢嘉樂重返「舞」林周身痛

·1 分鐘文章
狄易達及王君馨齊撐跳舞真人騷節目。
狄易達及王君馨齊撐跳舞真人騷節目。

藝人狄易達、麥秋成、錢嘉樂及王君馨等昨日出席無綫真人騷節目《盛.舞者》記者會,以導演身份現身的嘉樂「武」功了得人人皆知,原來37年前他曾參加街舞比賽,問到屆時可會技癢上台表演霹靂舞?他笑說:「依家周身骨痛,諗都冇諗,但最後都郁幾下,跳完就痛幾日!」對於有指他為了該節目而推了工作,嘉樂表示只是檔期遷就:「曾志偉同王祖藍開到聲嘛!原本呢段時間返內地做真人騷。(損失幾多?)冇去理,朋友講心唔講金。」

而狄易達對於被指與前港姐陳曉華翻撻?他笑笑口否認:「冇,呢排專注做節目。(個節目只係做1個月!)忙呢個節目好難約嘅。(即係唔否定會翻撻?)梗係唔會否定。(有機會?)乜都有,依家冇諗咁多,專注享受人生,早上排舞,夜晚打牌。(會唔會好似麥秋成咁突然宣布結婚?)可能會。」而新手爸爸麥秋成表示有協助太太湯怡湊女,但手勢不及對方:「佢可以單手抱起BB,另一隻手揸奶樽。(見住個女唔捨得返工?)依家日日望住佢個樣,老婆會Send張女相叫我加油。」

錢嘉樂指今次返TVB做節目,為朋友講心唔講金。
錢嘉樂指今次返TVB做節目,為朋友講心唔講金。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能