【姜濤生日快樂】獲粉絲豪擲逾50萬設8大應援位慶22歲生日 姜濤：我都有看到

今日（4月30日）係姜濤22歲生日，粉絲「姜糖」們每年都會為佢花盡心思準備生日禮物，規模仲一年比一年盛大。兩年前，姜濤曾經收過粉絲以其名義喺新西蘭買嘅地皮畀佢代表支持環保；今年「姜糖」們更準備一系列「Happy Keung To Day」應援，除咗喺港島區買下多個燈箱同車站廣告，更加豪花6位數字買下電車廣告，打造一部「姜濤號」為佢送上祝福。

姜濤噚日就喺IG限時動態感謝「姜糖」們支持，指：「謝謝大家為我做的一切，我都有看到！」，「姜糖」們送嘅驚喜當然唔至咁少，據知，今年「姜糖」們豪花逾50萬為姜濤慶生，充滿濃濃愛意，難怪就算姜濤忙住排練演唱會都喺凌晨時份發文感謝「姜糖」們：「謝謝大家。生日願望，一切平安。」

「姜糖」們為姜濤製造「Happy Keung To Day」8大應援驚喜

1. 巨型LED生日片
「姜糖」們喺全港7幢大廈租用巨型LED屏幕播出祝賀姜濤嘅生日短片，包括中環威靈頓街26號、尖沙嘴重慶大廈、旺角百老滙外牆，同埋近姜濤居住嘅銅鑼灣寓所附近：銅鑼灣黃金廣場、銅鑼灣Sogo巨型電視、銅鑼灣明珠廣場、銅鑼灣羅素街外牆，有「姜糖」仲話要將銅鑼灣打造成「姜濤灣」。短片每小時播放18次，片長每次10秒，由4月27日播到4月30日，估計約20萬。

2. 電車廣告打造「姜濤號」
繼舊年「姜糖」們藉姜濤喺台北拍攝《超感應學園》嗰陣租用3部美食車同流動宣傳車幫佢加油，同埋試過喺巴士車身賣廣告，「姜糖」們呢次特登買起一架由石塘咀至北角線嘅電車車身廣告，「姜濤號」除咗有姜濤個靚仔樣，仲有祝福句子，估計要約16萬，厲害到連「香港電車」專頁都話會將百德新街電車站暫時命名做「姜濤灣」。

3. 巴士站燈箱廣告
「姜糖」們仲喺九巴一共10個巴士站落廣告，遍佈尖沙嘴、旺角、佐敦、油麻地、荃灣、沙田、元朗、將軍澳等地區，寫上祝福生日字句嘅應援燈箱會喺4月30日至5月6日開始，估計約6萬。

4. 周刊全版海報
「姜糖」們仲喺4月30日出版嘅本地周刊中間內頁刊登「姜濤22歲生日」全版海報。

5. 代姜濤慈善捐款
「姜糖」們慈善應援姜濤，後援會以姜濤名義捐款1萬元到世界自然基金會WWF HK支持保育地球生態；亦有「姜糖」捐款至SAA保護遺棄動物協會，以姜濤名義捐助1隻於會內當月生日的毛孩，而SAA保護遺棄動物協會專頁就喺今日送上生日卡予姜濤作恭賀。

6. 包場聚會
早前抽出「姜糖」幸運兒出席4月28至4月30日下午5時至7時私人包場聚會，有粉絲將呢3年嚟嘅珍藏作為場內佈置，畀大家打卡留念。報咗名嘅「姜糖」會有限量應援包之外，頭50位到場更加有免費凍桃茶。

7. 姜濤扭蛋機
安排兩座扭蛋機畀「姜糖」們扭蛋，入面有隱藏版「小姜濤」、「叱咤姜濤」及「交通督導員姜濤」等特別造型嘅小禮物。

8. 銅鑼灣街頭派小禮物
有「姜糖」自發喺今日姜濤22歲生日（4月30日）喺銅鑼灣派發45份「龍婆勁粗糙DIY匙扣」，入面隨機放入生日應援小小禮物，限每人取兩份。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！