王俊棠帶領TVB龍舟隊尾二衝線 安德尊不滿串爆：一人累全家

噚日（10日 ）就係端午節，大家除咗食糉之外，當然要欣賞扒龍舟賽事先至夠氣氛啦！沙田城門河舉辦《沙田龍舟競賽2024》 ，而TVB今年亦有派由職藝員組成嘅龍舟隊參加「無綫盃」中龍混合邀請賽，結果以尾二成績完成比賽，坐喺錄影室嘅主持「大王」安德尊竟然直指王俊棠「一人累全家」。

TVB每年都會派出龍舟隊參與賽事，而今年都唔例外，仲搵嚟王俊棠（棠哥）帶隊。喺賽事開始前，坐喺錄影室嘅主持「大王」安德尊及麥美恩亦有為多謝同事們嘅參與及表示高層亦有到場支持：「各位觀眾，萬眾期待嘅無綫盃又嚟喇！我哋要俾多啲掌聲我哋嘅同事先，日以繼夜，除咗返工之外成日去練水。高層都有去」之後，大王就話 ：「（棠哥）王俊棠今年仍然都有份，不過今年佢破天荒做鼓手。」麥美恩就即刻醒目提醒 ：「你小心啲講喎，唔係一陣又做新聞㗎啦喎！」

不過大王無有怕，繼續話 ：「無辦法喎，因為佢一人就贏全家，一人就累身家！ 累晒人哋架！佢叫喊令人好炆，佢又扮大佬喎！佢今年做鼓手，鼓手應該畀個香港小姐坐喺度，等我哋睇住香港小姐扒呀嘛，佢嗱口嗱面咁，你點樣同佢划艇呀！」麥美恩就幫手打圓場話 ：「可能佢今年可以反敗為勝呢？我話你聽，我對棠哥有信心！」

而現場嘅王俊棠喺接受何泳芍訪問，非常有信心咁話：「我哋今年都好勁㗎，你知啦後浪推前浪呀！新人換舊人，我哋啲新人猛將如雲呀，想輸都難。今年我哋練習咗11堂，我因為工作好忙有幾堂冇到，好耐冇試過扒11堂，今次真係想輸都難啦！」最後佢哋齊齊叫口號為自己打打氣。

最終TVB龍舟隊以尾二成績完成比賽，喺現場做旁述嘅鍾志光就表示TVB隊而家好落力，不過大王就似乎唔多滿意，表示 ：「你代表TVB打鼓呀，你又乜理由，你棠哥又黑口黑面，你一人累全家而家！頭先你見到個女健兒一邊吹BB一邊打鼓，佢就自己喺度打自己喺度打，點會有節奏呀！你話呀！」而麥美恩亦表示同意 ：「係有啲影響嘅，我都覺得有啲影響嘅，嗰個發力又真係差啲嘅大家。 」

大王仲話 ：「係差好遠。（麥美恩：好遠呀係？）梗係啦！你棠哥又練水練得少，人哋練11堂佢得嗰3堂！淨係掛住四圍去搵食（麥美恩：佢又誠實得濟），你咁樣你累咗啲同事，同事咁有心機日日去練水！係咪咁講呀！」最後麥美恩再次打圓場︰「係係係！我哋收返少少，一陣又話你針對棠哥架啦！」之後，大王大讚鍾志光係高手，用「我哋TVB隊力壓7號！」好唔簡單，成功轉移話題。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！