王卓淇轉戰內地初嘗拍短劇滋味 拍片大爆人工仲低過TVB！

王卓淇（Erin）2014年勇奪香港小姐亞軍入行，可惜星運平平，至2021年離巢TVB轉戰內地做KOL，不時拍片分享生活點滴，曾自爆因為當時喺TVB嘅收入唔夠生活所以決定離巢。王卓淇日前拍片再一次提到TVB薪酬問題，不過今次就反口話要為TVB平反。

近日王卓淇為內地網上短劇客串，並將內地短劇及TVB劇集薪酬作比較：「首先大家成日話TVB嘅收入唔高，喺香港嚟講係唔高，但係同內地短劇比呢，其實係OK㗎喎。因為呢度嘅成本係幾百蚊一集㗎咋喎，幾百到幾千，你好紅嘅短劇演員都係幾千蚊一集，除非你係一線呀，咁可能佢有一兩萬一集，但係一般都係幾百蚊一集嘅啫。所以TVB都有…一千幾千一集，仲低囉呢度！唔係最差㗎其實TVB，平反一下先。但係短劇真係低成本，製作又快，收益又高啦，因為而家好hit呀嘛，所以就嚟試一日。」

之後佢再表示內地網上短劇比拍TVB劇集輕鬆：「因為短視頻／短劇節奏真係好快，跟住你嗰句對白講錯咗，你可以中間接啦！」，之後佢表示自己問內地網上短劇製作人拍攝時間，原來今次嘅內地網上短劇拍攝時間只需要6日，比起港劇少好多：「港劇係要拍一套戲至少三個月，其實唔止港劇，我相信好多內地劇都係拍三個月到半年，但係佢哋係可以六日拍完一套，好犀利，90集囉，當然一集係分零鐘，咁但係好勁囉呢個效率！佢即刻就可以拍第二齣，可以拍好多好多戲，都幾好玩，如果將來有機會都可以繼續嘗試。」

影片出街後，隨即吸引唔少網民留言，例如「你要對比翻(返）物價，tvb就真係好低咯」、「內地消費水平跟香港比？」、「TVB唔係一般低咯，當你2千一集，一套劇20集，要拍3個月，即係4萬除以3個月，平均13000一個月，去洗碗都好過佢啦」及「你試吓拍内地的綜藝節目或者内地的連續劇，相對都比TVB高，而且内地消費普遍比香港低」 等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！