王宗堯判囚 太太Julia打理小食店「見攰就唞」休業一天

藝人王宗堯因涉及2019年七一衝擊立法會案被控暴動罪成立，上周六被判囚6年2個月。根據報導，判刑時王宗堯將拳頭放於胸前，而其太太Julia得知刑期時頓然眼紅紅，離開法庭時亦有抹去臉上淚水。

王宗堯候審期間與Julia在太子開設小食店，而Julia聽完審訊之後以至翌日仍然返鋪頭，可見佢對小食店有幾堅持。不過小食店尋日喺IG出post表示今日（周一）要休息一天。「最近唔知大家有冇成日喺街度見到呢幾隻字 "見攰就唞" 。最近真係有啲攰啦， 星期一全店休息一天」。

小食店喺近排擺咗個信箱，代收顧客交俾王宗堯嘅信件，喺宣布休息嘅post都有寫道「等老闆安頓好之後我哋會安排送到佢手上。好多謝你哋每一位嘅支持同關心，希望各位都繼續好好生活」。

王宗堯同Julia去年10月喺太子開設嘅小食店，以台式刈包及冷泡茶做主打，但原來兩個人從未做過飲食生意。王負責設計而Julia主力營運，佢地都表明希望呢盤生意嘅目標係賺錢，以建立一個商業模式，等同佢地一樣冇咩經驗嘅營運者，都可以喺海外做到小生意。而王宗堯被定罪後，喺求情信提到被捕後人生停頓下來，並稱呼Julia為太太，感激對方同佢分憂。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！