王宗堯曾被譚詠麟賞識 拍《喜愛夜蒲》變男神 同蔡潔陳靜蘇皓兒有過戀情

因涉及2019年七一闖入立法會大樓案而被判暴動罪成嘅王宗堯，入行20年星途不算一帆風順。王宗堯自幼家境不俗，童年時更於尊龍主演電影《上海1920》客串。後來王到英國升學，畢業後於父親公司工作半年，就被送到台灣投靠認識娛圈中人嘅親戚，因此而入行。

王宗堯曾與台灣藝人公司簽約，與何潤東、邱澤同門，但發展6年未見起色，於是回港發展，曾參演亞視劇集《勝者為王》、TVB劇《你們我們他們》等。王宗堯回流後更一度獲譚詠麟賞識 ，搵佢同彭健新合唱《理直氣柔》。

2011年嘅《喜愛夜蒲》令王宗堯人氣漸升，而為HKTV演出劇集《導火新聞線》演攝記輝爺，更令王變成男神。2014年王宗堯喺佔中期間現身現場後，開始高調就社會事表態，但亦因政治取向，幕前機會漸漸減少。王宗堯2019年9月底因立法會案被捕，2020年底簽約杜汶澤旗下。

貴為男神，王宗堯曾經喺訪問直言女友數目「數唔晒」，更同過好幾位圈中女神拍拖。其中陳靜Dada係王宗堯第一位圈中女友，二人識於微時，即使分手收場，但Dada早年因情緒問題休養時，王宗堯都有慰問支持。不過最爆嘅都係同近年TVB力捧嘅蔡潔有過一段情。王喺杜汶澤嘅節目上提到，2016年7月同蔡潔撻著後，帶過女友去周家怡生日飯局，點知半年後蔡潔向傳媒表示，因為工作關係少見面，決定同王宗堯分手。王踢爆原來蔡潔有段時間忽然玩失蹤，佢要睇新聞先知被分手。

王宗堯嘅舊愛名單仲有黎紀君、前女團As One成員蘇皓兒、「浸大E神」楊梓瑤等，而現任女友係圈外人，二人仲一齊打理服裝品牌。