王祖藍與香港警察合作拍片 重現當年《保持通話》經典潮語

王祖藍近年駐內地發展，綜藝節目及商演演出機會多多，賺到豬籠入水，不過佢都不忘香港及一眾香港粉絲，除咗喺小紅書拍片介紹香港地道美食，與阮兆祥和李思捷相隔6年合作主持嘅扮嘢真人騷《福祿壽訓練學院》亦會於本月31日接棒《中年好聲音2》播出。王祖藍扮嘢能力出眾，每次都令觀眾發笑；早前，佢就發揮其扮嘢能力，與香港警察合作拍攝提防詐騙嘅宣傳片，重演當年電影《保持通話》「幫緊你」一幕。

潮語「幫緊你，幫緊你」其實係出自於古天樂、徐熙媛、張家輝主演嘅電影《保持通話》，電影中古天樂喺拯救徐熙媛過程中手機冇機，於是入咗一間手機店買充電器，飾演電話銷售員嘅王祖藍卻問長問短。香港警察社交平台就PO出「香港警察 X 王祖藍 • 幫緊你幫緊你」影片；短片中，騙徒喺電話與被指參與洗黑錢嘅受害人保持通話，受害者手機無電於是衝入手機店向銷售員王祖藍購買充電器，王祖藍表示：「幫緊你，幫緊你」，又問及對方：「需要國產定美版？」、「有公仔定無公仔？」、「有燈定無燈」等等，受害人感到唔耐煩，於是用手指指住王祖藍，王祖藍就乖乖拿出充電器。受害人畀完錢之後衝出店舖，結果被警察攔截並叫佢冷靜，直言對方係騙徒。片段最後寫住「未完待續」，大家就期待一下下集仲會唔會有王祖藍嘅演繹啦！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！