王菀之舊愛 風流詞人梁栢堅娶白淨靚女震撼娛圈 阿Bob：唔＿係呀

填詞人梁栢堅向來俾人玩世不恭嘅感覺，但係尋晚佢居然公布11月結婚，唔少圈中人都覺得詫異！

梁栢堅喺自己IG出post公布喜訊，寫道「話說今年年頭《喱騷》賀年節目，楊天命批我今年結婚，我醉住心諗仲唔踢你長毛館？ 但最後都俾佢批中（好彩佢冇批我做老竇同戒酒），宇宙命數有時好＿難講，我都結婚，呢個世界永遠充滿無限可能性，鬥長命，見字飲酒」。

一眾圈中好友都留言恭賀，其中同屬詞人嘅黃偉文(Wyman)仲話「唔駛批命，我第一次見到佢，已經知你會結婚」。而插畫家兼填詞人小克更加送上畫作。梁栢堅經常喺社交平台post花天酒地嘅相片，令人好難相信會結婚，難怪阿Bob都喺醒獅師傅「三姜」（姜偉池）嘅facebook留言爆粗話「唔＿係呀」！

梁栢堅未婚妻Fergana就喺IG post出二人結婚相，著晒老西嘅梁栢堅真係前所未見！睇返Fergana IG嘅個人照，外表白淨靚女，能夠收服浪子確係犀利。

44歲嘅梁栢堅本來係銀行後勤主管，因緣際會之下認識周國賢等音樂人，後來自薦成功為歌手填詞，主要與樂隊Kolor、張繼聰、周國賢等合作，代表作包括ToNick嘅《長相廝守》。梁栢堅曾經同王菀之拍拖，有傳因為有人發現對方對感情太認真而分手。梁亦同過前立法會議員陳淑莊及吳若希傳緋聞。2017年一批疑似梁栢堅床照流出，更被爆扮單身偷食20歲少女，仲「搞出人命」，梁被指叫女伴買胃藥墮胎！而梁栢堅後來就話係俾前度用床照威脅喎。

填詞以外梁栢堅亦同盧覓雪主持YAHOO TV訪談節目《Mean傾》，不如搵雪雪親自質問梁栢堅點解會結婚咯！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！