王菲前經理人湊大陳寶蓮遺孤 21歲邱煌禕變紋身型男做rapper

亞姐出身、曾於90年代拍過三級片嘅已故女星陳寶蓮(Pauline)，2002年逝世時遺下不足一個月大嘅兒子。後來同陳寶蓮相識嘅王菲台灣前經理人寬姐（邱瓈寬），決定負起撫養陳寶蓮兒子責任，並為養子起名邱煌禕(Don Don)。

不知不覺間，跟隨寬姐在台灣生活嘅邱煌禕已經21歲，手腳都有紋身，外表同台灣男演員柯震東有幾分似。近年邱煌禕加入說唱組合YO MOB成為rapper，組合仍在奮鬥階段，官方IG帳號有千幾人跟蹤。過去不時都有傳媒關注Don Don生活，早幾年有報導話Don Don係籃球健將，代表學校出賽，仲喺18歲時post過同女友合照。

陳寶蓮原名趙靜，12歲跟隨母親由上海來港，因為身形高佻15歲就被相中做model，17歲參加亞姐後入行。陳寶蓮出道無耐就轉戰影圈，因為90年代三級片盛行，Pauline被邀請拍三級片，拍過《燈草和尚》等艷情片，但最為人記得嘅可能係《國產凌凌漆》嘅愛美神。

陳寶蓮多年來情路崎嶇，曾與莫少聰及黃子揚拍拖都係分手收場。後來佢同台灣富商契爺黃任中過從甚密，成為當年八卦熱話。緋聞以外，陳寶蓮多次因為情緒不穩神智不清而見報。

2001年，陳寶蓮同美籍華人DJ交往，不過無耐就分手，及後發現懷孕。但係Pauline決定留住BB，2002年喺上海誕下兒子。可惜喺產後未夠一個月，陳寶蓮被發現喺寓所大廈從高處墮下逝世，終年29歲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！