【玩樂】聖誕私房 Party Games

搞聖誕party，無論你只請close friend全場熟人，抑或半生半熟諗住識啲新朋友，總要袋定幾個party game比大家混熟啲或者炒熱氣氛。唔通切完聖誕蛋糕叫人參觀你間屋、或者即刻抽嗰啲上限一百蚊嘅聖誕禮物咩！作為一個搞手，你絕對有責任擔起令大家盡興而回嘅責任。快啲save低以下幾個Party game以備不時之需啦！

Photo Props
搞party一定有人唔準時，又唔可以叫早到嘅朋友「乾爭爭」等到悶，反正大家咁鍾意影相打咭，準備定一堆道具例如肥姐眼鏡、珠片衫、魔術師帽比大家影相warm up住先。有時間及心機嘅仲可以親手做啲食得嘅photo props，又食又玩，順便可以send比遲到嘅朋友「溫馨提示」佢party已經開始。

估電影
Print 定一啲經典電影對白，剪成一張張咭仔。分成小組互相估吓對方講嘅對白屬於邊齣電影。邊隊輸贏唔係最重要，最重要係過程中你大概可以掌握大家嘅品味喜好，邊幾個識背晒周星馳、邊幾個係王家衛fans，啱咀型嗰啲下半場自然會自己埋堆。

收買佬
老土？睇你收買啲乜啦。我就唔信你鬥快收買3條孖煙囪或者2對大眼仔會有人嫌老土喇。發揮你嘅創意，保證大家放下身段愈玩愈癲。前提當然係你班friend玩唔玩得啦，不過根據我經驗，大家為咗贏通常都會不擇手段去到盡。

尋寶
收埋特定物品響間屋，限定時間之內搵到就可以得到聖誕大禮。有乜好玩？sorry呢個只係扮party game，事實係你半年前響屋企唔見咗本書 / DVD / 電視搖控搵極都搵唔番。難得有咁多人響度又有時間不如扮玩game等大家一齊幫你搵啦！不過如果你收埋好多甜碟甜書或者其他唔應該俾人發現嘅玩具就記得要鎖得好啲啦。

圖片來源：
flickr: https://www.flickr.com/photos/pixlense/12149158193