玲玲友情報丨Bob林盛斌用長銀包吸金 玲玲師傅平時著睡衣都袋幾萬蚊？

J2清談節目《玲玲友情報》由堪輿學家麥玲玲、J2ers黃紫恩、陳欣茵及蔡景行擔任主持，前晚（27日）嗰集以「成功人士」作為主題，邀請金牌司儀，更有「金牌媒人」之稱嘅林盛斌（Bob）做嘉賓，分享成功之道及教大家點樣吸金。

《玲玲友情報》首先指出有92%成功人士只係得一張信用卡，玲玲師傅表示正常一定有信用卡，不過佢就鍾意用現金多啲，仲笑話：「平時著住睡衣都袋幾萬蚊喺身」 ；而Bob亦表示自己得一張信用卡，係一張公司嘅信用卡，之後就分享自己一段慘痛經歷話：「因為我啱啱有機會申請信用卡就係大學嘅時候，一入O camp就已經好多人叫你申請，當時我申請咗兩張信用卡，完全冇乜點用過。嗰陣屋企環境唔好，一嚟阿爸阿媽就透支錢嚟維持當時嘅屋企，要不斷還最低付款額，每個月一千蚊，還咗好一段時間，跟住以後對信用卡有咗抗拒，所以出到嚟做嘢之後，冇乜點用信用卡。去到自己成立公司，有時可能出去應酬，有時要使下啲錢，就用呢張公司信用卡。」

玲玲師傅表示同阿Bob都係「老派人」，身上要有足夠嘅現金，個人先有安全感。之後，阿Bob分享用長銀包催財運嘅心得，佢表示：「自從用咗長銀包之後，我鍾意擺多啲cash喺入面，大概係5位數啦！我要覺得個銀包係要脹卜卜，滿一滿，唔係個安全感，而係散發個氣場出嚟話俾人知，我要吸引多啲嘅錢返嚟。同啲錢要擺靚佢，大紙擺一邊，細紙擺一邊，但係啲散銀我就唔帶。玲玲師傅表示自己都係咁樣，並問Bob有冇用新銀紙嘅習慣，Bob就話：「我擺嘅都係大額銀紙，一千蚊同五百蚊都係新銀紙，因為你對啲錢好，啲錢就會對返你好，你啲錢住喺你銀包住得舒舒服服，佢就會叫啲朋友過嚟一齊住」。

另外，玲玲師傅認為成功人士都好有手尾，好似喺住酒店就可以睇得到，住完酒店會執拾，好似冇住過咁，並指據聞劉德華住隔離酒店，住完會將所有嘢還原。而Bob就認為成功人士嘅特質係有好高嘅自律性、對自己有要求及規律，例如一世人未試過遲到。陳欣茵再指成功人士都會做運動及睇書，阿Bob表示非常認同。玲玲師傅再指出成功人士都係會早起身，因為早起身可以運用更多時間，玲玲師傅話自己早起身會先做運動，每日跑5至7公里，再行16層樓梯。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！