是日噏day：當你明白，你只是碰巧不是同性戀 你大概不會想他們生活得那麼難

如果記得自己只係碰巧唔係同性戀者，我唔明白點解部份異性戀者，成日都要令到同志生活咁難。

社會上講同志平權，好多時都係由同性戀者提出，當中亦會涉及「出櫃」的經歷。有時候，特別係當我見到一啲同性戀者比社會虧待嘅事情嘅時候，都會覺得氣憤，當中包括早前經香港轉機，亡夫骨灰差D俾機場保安公司職員沒收嘅英國人Marco Bulmer-Rizzi先生。不禁要問：點解呢個社會要咁樣虧待佢哋呢？

「出櫃」呢回事，喺同性戀嘅角度，可以係好大件事。但其實異性戀者「出櫃」嘅一刻，每個人亦都同樣應該好好記住。睇到呢度，你可能覺得我胡言亂語，異性戀者喎，出咩櫃啊？你講咩啊？

或者換個講法講，同(雙)性戀者人生中，有所謂意識到自己喜歡同(雙)性嘅一刻。你估異性戀嘅就唔會有意識自己喜歡異性嘅一刻咩？只不過係一切都太過順理成章，比起同性戀者知道、理解並公開自己喜歡同性，來得容易，容易到無異性戀者會提會講。

我估有好多人，都已經唔記得左自己人生中，好可能曾經思考過自己係喜歡同性定抑或異性。又或者就算有諗過，都唔會敢宣之於口。但係當社會存在着同性戀、雙性戀同埋異性戀嘅同時，有幾多人，一世人從來無一刻諗過：「咦？如果同同性喺埋一齊，我O唔OK呢？」

我當然冇辦法訪問晒全世界嘅人，但至少我身邊思考過呢條問題嘅朋友，亦都唔少。我自己年青嘅時候，應該係喺剛剛入大學嘅時候，亦都曾經好認真咁思考過呢個問題。思考嘅結論係：我係鍾意異性，確實係對同性冇興趣。

突然講起自己思考「我喜歡同性抑或異性」，想點出嘅重點係，喺思考自己喜歡異性定同性嘅嗰個決定性瞬間——

我只不過係完全毫無道理地，碰巧咁岩感覺到自己係喜歡異性。

同性戀者，喺面對同一條問題嘅時候，亦都只不過係碰巧咁岩發現自己原來係喜歡同性。情況有啲似咩呢？就好似電影《迷失決勝分》（Match Point），網球碰到球網，究竟係跌去對手嗰邊？定還是跌落自己嗰邊？

一切，原來都只係碰巧。

咁碰巧生而為異性戀者嘅人，究竟有咩資格，去剝削碰巧身為同性戀者嘅人嘅權利呢？

憑嘅唔通就係，你咁岩咁好彩冇跌落「小眾」嗰邊？

仲要講緊，性小眾嘅所謂「唔好彩」，唔係與生俱來嘅「不幸」，單純地就係因為係受異性戀者嘅歧視而產生嘅。

所以，唔好再剝削性小眾的機會了，唔好再毫無因由地貶低佢哋做人嘅尊嚴。就好似之前爆出嘅事件——香港機場打算拎走英國男同志Marco Bulmer-Rizzi嘅遺孀David Bulmer-Rizzi骨灰事件咁。因為度蜜月嘅地方南澳，唔承認同志婚姻。David意外墜樓梯身故後，死亡證寫上「未婚」（never married)，令Marco難受之外，更不能決定亡夫身後事。之後途經香港轉機，香港機場保安差d想拎走遺孀手中骨灰。最愛喺度蜜月時不幸遇上意外天人永隔，點解仲要人為地加重遺孀嘅悲痛呢？
正如Marco Bulmer-Rizzi 先生，喺亡夫捐出器官後講；「David遺體的器官，分別捐予三名人士，包括一位育有兩個孩子的爸爸。一覺醒來，這位爸爸不會想，David這位捐贈者是否同性戀，醒來後他只會想到，他再次有機會親眼看著他的孩子長大。」

同性戀者，無因為別人咁岩係異性戀者，去虧待佢地。同性戀人並無要求額外嘅東西，只係希望咁岩喜歡異性嘅異性戀者，唔好奪走同性戀者一D平常不過嘅生活。
要對等對待，真係有咁難咩？

(左) Marco Bulmer-Rizzi（右）David Bulmer-Rizzi

text by Tyler Li

(圖片來源：Marco Bulmer-Rizzi facebook)