直播靈接觸｜關寶慧講撞鬼經驗 住酒店被靈體討論戒指 拍戲拖鞋離奇變形

由梁思浩主持嘅TVB PLUS節目《直播靈接觸》，周二晚一集搵到思浩好友關寶慧做嘉賓。梁思浩同關寶慧多年前曾於有線主持靈異節目，而關寶慧表示因為有「經歷」所以答應。關寶慧成日「見到嘢」，咩形式都見過。

關寶慧提到喺酒店係見到靈體嘅熱門地點，見過有「人」扮佢，但全身綠色；寶慧又見過靈體以一團黑色嘢出現，更爆係試過一個人住酒店，臨瞓前聽到3把男人聲討論佢放喺床頭嘅戒指，仲話「好靚呀」、「係咪呢隻？」、「得呢隻之嘛」等對話。寶慧以為聲音來自隔離房，但又覺得入住嘅係大酒店，冇理由隔音咁差。當時關寶慧喺床上動彈不得，於是開聲叫「3位男士」離開。

成日「見到嘢」令關寶慧受困擾，於是搵法科師傅做儀式「封眼」，本來真係有效，寶慧話有5年成個人shut down，感覺唔到靈體存在。不過有次拍戲，關寶慧要演印傭，造型上要著拖鞋，於是佢出動一對多年前上內地拍戲時喺入住酒店買嘅拖鞋俾劇組。關寶慧強調對鞋冇著7－8年，拍攝時由服裝人員保管，開工第一日都冇事。到第2日開工，寶慧化妝期間發現著唔到第2隻，而且忽然發覺一邊拖鞋變細，意識到可能撞鬼，於是打畀張芯薰師傅，師傅話有隻女嘅匿喺隻鞋度。寶慧提到另一個師傅話，呢個「女嘅」好鍾意睇寶慧拍戲……

關寶慧另外分享咗同梁思浩喺有線錄影廠做直播靈異節目嘅怪事，佢地話當時覺得個錄影廠好陰﹐寶慧仲話有盞燈長期閃。後來關寶慧同梁思浩喺phone in環節聽到個淒怨故事，有位住屋邨男子打嚟，話佢嘅鄰居生前係舞小姐，後來因為情殺案而毀容再被燒死，聽到所有人好動容。但寶慧憶述，當講到女死者被燒死時，全廠突然停電2分鐘，佢認為可能係女死者「提醒」唔好再講。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！