雅虎香港新聞 【一睇就識集運】4間網購集運好推介
淘寶封殺順豐，最受影響的，是一向選擇直送香港的買家﹗不過直接運落香港，其實運費非常昂貴，如果件貨有返一定重量，分分鐘運費仲貴過你件貨！
設計圖片來源︰freepik
其實玩開淘寶嘅人，通常都會選擇用集運方式送貨返香港，除咗運費平好多，仲可以幫你將唔同店鋪嘅貨品集合埋，一次過拎，慳水又慳力。但其實集運係點運作、想集運又應該點做呢？
集運嘅運作方式？
淘寶係由唔同嘅網店所組成，當你係每間店舖完成交易後，店家就會幫你Pack好，用快遞寄去你畀嘅地址，其中「最傳統」嘅方式，就係直接由發貨地寄到香港，送到府上；但由於需要過境，運費就變得好貴。而集運就類似係中介嘅角色，佢哋係內地會設有收貨地點，買家只要係集運公司註冊，並將收貨地改為集運公司收貨地址，並且係地址尾端填上會員資料，集運公司收到貨後就會幫貨件登記。當你係唔同嘅網店買得越多嘢，唔同地方而來嘅貨全部集齊後，買家就可以從集運公司網站，將所有貨件集合並申請集運，集運公司就會幫你集合哂所有貨件，送到相關取貨點。一般而言，集運公司收貨點設於內地，因此買家只需繳付內地運費，好多店仲有免郵活動，連郵費都唔洗畀，之後大家取貨時，只需要向集運公司繳付該公司嘅運輸費用就夠。
應該點樣揀集運？
內地運費問題解決咗，集運公司嘅收費就好緊要喇。集運公司有分為私營集運公司及官方集運。現時淘寶設有官方集運系統，買完可直接選擇內設嘅官方轉運商，選擇你想要嘅集運公司。私營集運就另外有自己嘅網站，大家揀啱就去相關網站照足佢哋嘅教學申請同輸入資料就可以。
收費方面，無論官方定私營都好，佢哋都會分「自提點提取」同「送貨上門」兩種收費。「送貨上門」價錢當然較貴；但選擇「自提點」，就要睇返快遞公司有咩地點可以取貨，如果太遠嘅話，其實計返車錢、人力、時間，條數就可能同送上門差唔多！
官方至抵玩之集運
官方集運價格比起私營貴少少，每間快遞自提同送貨上門嘅價格差異都比較大，有部份首重平但續重貴，有啲就調轉，以下兩間就係就平均價而言，比較抵玩嘅2間。
4PX遞四方（morning）——自提最抵
呢間嘅自提價格係官方咁多間入面最平一間，首公斤為10.5 RMB（約12HKD）、續重每0.5kg加3 RMB（約3.4 HKD），不過如果選擇係7-11拎貨，首重就要加5 RMB。以官方集運而言，呢間比起某啲私營集運仲抵添。
中通快遞——送上門較平
送上門嘅價錢比起自提會貴少少，但如果買得嘢多又重要送上門的話，就可以選擇中通快遞，首重18 RMB（約20.6HKD）、之後每0.5kg加4 RMB（約4.6HKD），都算係咁。不過送上門大家要留意，有啲地區需要每單加返住宅或偏遠地區附加費，大約係20 RMB（約22.9HKD），大家使用服務前最好睇清楚先。
私營集運至平之選
唔同嘅私營集運價格都好以差好遠，但呢兩間至抵嘅集運店，其實無論送上門定自提，價格都係差一兩蚊，加上每次用集運，金額可換作點數，儲嚟下次當現金用，真係幾抵㗎！加上佢哋自提點非常多，幾乎每區都有幾間，梗有一間喺附近！
UCBuy網購易——自提平通街
官方網站：按此
呢間網購服務平台自提點首重約7HKD至13HKD不等，視乎自提門市，而續重就所有店都係每公斤7HKD。
送貨上門嘅話，無電梯嘅唔送，工商區首重20HKD，續重每公斤8HKD，住宅或偏遠地區需收取25HKD或以上附加費，視乎情況而定，有興趣可向官網查詢。
集運王——派送自提兩相宜
官方網站：按此
自提點非常多，每一區都有幾間，大家可以去網站查閱返相關資訊。佢嘅自提收費首重大約10HKD至14HKD不等，續重則每公斤6HKD。
集運王送貨上門，工商區首重20HKD，續重每公斤7HKD，住宅或偏遠地區就需另外收取20HKD至25HKD附加費。
相關內容
想追蹤更多最新最好的親子資訊？請瀏覽我們 親子頭條專頁
