睇晒400集《愛回家》後想拍劇 丁子朗入行2年呢個情況下首次畀家用

《青春不要臉》成功令「舟仔」丁子朗(Karl)彈起。入行6年已經做男一，雖則算行得快，但係都有捱嘅日子。

唔少大台女藝人都係海外佳麗返香港選美入行，估唔到丁子朗都係行同一條路。佢現身YAHOO TV《娛樂訪談》時提到，14歲移民加拿大之後，讀書時期好開心，仲有時間煲劇，《愛回家》第一輯全套400集睇晒！丁子朗因此對演戲有興趣，大學一年級暑假參加當地中文電視台選秀活動，冇獎攞但係遇到專程嚟揀蟀參選港男嘅TVB高層樂易玲。

Karl諗住放暑假一試無妨，4日後就返咗香港，但係中間用咗3日說服父母。屋企人擔心嘅理據都係嗰啲︰娛樂圈係大染缸、做咩放棄學業，仲有就係連海外華人都知嘅「TVB人工唔高」。出道2年，父母來港辦事，身上只有加幣，造就丁子朗第一次俾家用嘅時刻。「當時我同佢地講『我俾啲港紙你地用，當家用啦』。嗰個moment父母覺得『吓，你俾家用我？』」捱咗2年，有餘裕俾錢屋企，做仔嘅感受自然更深。

雖然喺香港出世兼住到十幾歲，但Karl對加拿大偶而都會思鄉，因為中學大學朋友父母都喺嗰邊，想做咩都得。喺香港一落地就要諗定交租食飯開支，工作mode長開，拍劇拍到半條人命時難免想「愛回加」一個禮拜都好。而家冇得飛，唯有拎返個初心出嚟，提自己幾愛演戲，再搏過。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！