睇片・香港農青｜棄金融業做豬場 遭收地擬移師新加坡 豬二代：港府唔重視農戶

「有啲鄰居都會話，唔係呀嘛？大學生養豬？」黃碩鋒 2000 年赴笈澳洲，取得金融及商業雙學位，2009 年畢業回港後在做過金融相關工作，月薪兩萬多。當時黃父年邁體弱，再捱不住那風吹雨打、半夜動身工作的養豬生活，換腎後與阿鋒來了個家庭會議，「爹哋就同我傾計啦，有無興趣做呢個農場呀，其實我睇得到嘅，因為佢望住我講嗰陣時係有個小小嘅expectation，即係話阿仔，你幫我手繼續經營落去啦」。父親靠農場養活一家，阿鋒亦不想家業就此完結，決定辭去做了一年的金融工作，成為「豬二代」。

順利農場原本是雞場，黃父 80 年代開始營運，直至 1997 年因禽流感殺雞，「爸爸當時見啲小朋友仲好細個，就咬住牙根咁捱落去，繼續做養殖業，變咗做養豬」。阿鋒 12 年前接手佔地八萬平方呎的豬場至今，豬場內養著大約 1,500 來自西班牙品種的「杜洛克」豬，肉質以鮮嫰多汁見稱。阿鋒形容，新鮮豬肉的口感與冰鮮豬不同，「冰鮮嘅咬落好淋，但新鮮豬係爽口、好 juicy」。他從美國採購大豆和粟米作為飼料，「見到自己養出嚟嘅豬畀人哋認同、你啲豬好食呀！咁都幾開心嘅！」

「明明係苦都笑住面對」

不過阿鋒笑言：「香港農業係地獄嚟嘅！明明係苦，但你都要笑住去面對」。因香港農業發展有限、土地不足、租金昂貴，「政府畀好少 support，都係靠自己」，加上養豬業有不少規範，包括豬場建築物高度、限養豬隻數量，「如果要豬場現代化，有無可能即刻 upgrade 到？無可能！」

經營豬場是阿鋒唯一的收入來源，直至三年前才敢成家，上有高堂下有妻兒，「始終做農業呢，收入都只係平平穩穩」。雖不會大富大貴，但他指「做農業就好實在」，日出而作、日入而息，「辛苦，但呢個係我嘅生活、我嘅習慣」。每天早上 6 時開工，員工負責餵豬，他開始巡豬場，「員工只係幫你照顧啲豬隻，但啲機器有無壞、要採購啲乜嘢，全部都係我自己去做...唔多唔少都有少少成功感，練到自己百武於一身，乜都要識」。

最怕豬瘟 生物保安嚴格

養豬的最大風險是傳染病，近年的非洲豬瘟最令阿鋒憂心，也是他任豬農的最大危機。他對「生物保安」的要求很高，記者與兩名攝影記者到訪前，阿鋒千叮萬囑不要經過街市、先洗澡才出發；進入豬場前換上水鞋、消毒鞋底，再穿上全身保護衣進入。阿鋒指「人生有好多小曲折」，說的是 2021 年 2 月初，附近農場爆發非洲豬瘟，「一聽到個壓力就好大，你唔知自己幾時會中招，一中招所有財產就會無晒」。

做好豬場實務和生物保安，順利農場最終都要敗在發展巨輪。2018 年阿鋒收到政府通知 2029 年將要收地。他本打算「見步行步」，怎料收地進程突然提前至 2024 年。「好多回憶喺呢個地方，呢個就係我唯一嘅原因點解繼續堅守喺呢個農場裏面。」當初轉行養豬是否做錯了決定？他再次苦笑，「人生無後悔藥食㗎嘛，有得有失囉！」

阿鋒指一直有就收地向政府反映意見，「政府咁耐以嚟都無乜同我哋接觸，唔重視我哋啲農戶」，他亦指「政府一早有做顧問報告，已經知道有農場喺度」。他續指，農場不如車房等行業，「唔係搵到個位就可以搬入去，農場受嘅管制係多好多」，加上農業用地不足，形容「要搬係 impossible（沒有可能）」。

擬移居新加坡養豬

面對如此狀況，黃碩鋒直言「都真係幾心灰」，心灰在多年來用盡時間和心血，「要諗之後要做啲咩都真係幾頭痛」，如果重投職場就要由低做起。他近年到台灣、韓國、歐洲及內地等考察養豬業發展，考慮眾多因素之後，或會在收地後移居新加坡，繼續養豬事業，「新加坡真係好重視，有資助、有方案去協助你」。新加坡當局還向業界提供技術支援，「香港人成日講薪火相傳，都要有市場、配套配合……我哋呢一行都已經無咩新血入行，去到我而家呢一代，我敢講已經係最後一代」。

發展局：元朗南發展 3 豬場、2 雞場受影響

發展局回覆《Yahoo 新聞》查詢時指，元朗南發展共分三期進行，整個發展計劃共有 3 個豬場及 2 個雞場會受影響。政府會向須遷離的合資格經營者提供金錢補償，讓經營者可作出籌劃及遷置業務。至於進一步支援方面，局方指發展局、環境及生態局、漁護署和相關部門已成立跨部門工作小組，制訂計劃提供不同範疇的協助，包括尋找土地以發展成多層式禽畜農場的重置安排。地政總署將逐步聯絡受元朗南第二期發展影響的經營者，適時進行資格審核及評估補償款額。