神耆小子丨朱斐斐離巢作 E Cup上圍震撼網民眼球 曾暴食變肥妹仔

TVB劇集《神耆小子》正熱播，前晚（20日）播出一集，講述醫館助理魯娟（尹詩沛飾）和病人程珍珠（朱斐斐飾）兩位情敵於內衣店相遇，身材出眾嘅珍珠串爆魯娟只有B Cup身材：「你B（Cup）咁Cute呀，我個胸又唔聽話喇，之前着開個Size唔啱喇，依家要A、B、C、D、E呀！由D去E呀！」魯娟因而感到不爽，於街頭與珍珠互扯頭髮兼推撞，打到瞓晒落地之餘亦搞到成地胸圍，情節爆笑。朱斐斐於劇中為引誘男神趙子勇（蕭正楠飾）經常打扮得超性感；佢亦為咗令角色身材睇起上嚟更逼爆，於是用Nu-bra及勁細碼衫去谷胸營造E Cup效果，豐滿上圍震撼網民眼球。

朱斐斐投考第26期無綫電視藝員訓練班入行，拍攝過逾80部劇集，不過所飾演嘅角色大多屬客串性質，角色亦以妹妹或學生妹為主，事業發展不太順利，因壓力患上抑鬱和暴食症，2019年體重更達人生巔峰68kg，覺得與大隻仔不相伯仲，情緒亦時好時壞長達3年，後來接受心理醫生治療同時靠運動減壓，成功令情緒回復平穩和修身。

朱斐斐2017年於《愛·回家之開心速遞》飾演「高栢菲（少年）」、2020年劇集《迷網》大學校花「阮燕菁」一角及2021年《寶寶大過天》印籍傭工「Siti」一角，令觀眾漸漸留意。不過，朱斐斐透露去年10月已約滿TVB並轉簽天盟娛樂公司，因而《神耆小子》係佢喺TVB最後一套劇集作品；佢亦涉獵多個範疇工作，包括兼職健身教練、開設健康食品及時裝網店、KOL，曾以「月租2W3的房子」為題拍攝，分享自己鄰近太子站、月租港幣兩萬多元嘅單位，又試過開直播大爆TVB藝人嘅片酬身價，朱斐斐現時就希望拍多啲自己隻狗狗和有關健身嘅影片，又希望繼續向演戲方面發展。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！