神耆小子｜鄭則士與冼靖峰一拍即合 Kent哥近乎24小時貼身指導

TVB新劇《神耆小子》將於5月6日起播出，演員包括鄭則士（Kent哥）、冼靖峰（Archie）、蕭正楠、樊亦敏、曹永廉、傅嘉莉、羅毓儀、魯振順、吳子冲及袁潔儀等人。Kent哥於劇內飾演零食集團「勁威威」CEO錢大海，喺商場同屋企都係「有佢講冇人講」，面對大海嘅高壓處事，家人表面言聽計從，但其實各有各陽奉陰違，大海更經常以遺囑作為威脅三人嘅籌碼。某日，大海上班途中突遭綁架，綁匪聲稱係受其家人指使，自此「查找綁架叛徒」風波一觸即發，偶然路過綁架現場嘅趙一鳴（冼靖峰飾）喺冇得揀嘅情況下成為大海嘅私人偵探，又被威逼收留大海。

曾有指Kent哥因糖尿病要減產，佢就否認，並指平日有控制好血糖，只要適合就會拍劇，又指除咗被好劇本打動，更有好演員配搭，笑言今次係抱住與後輩學習心態回TVB拍劇，仲表示有睇過今次演出對手冼靖峰（Archie）嘅劇集《青春本我》。Kent哥與冼靖峰一拍即合，冼靖峰又大讚Kent哥係位好前輩，不但教佢講對白加揣摩角色，更近乎24小時貼身指導及慰問，又樂於與後輩分享人生經驗：「由Day 1去到最尾嗰日，Kent哥都係教緊我嘢，佢知我演戲經驗好少，佢唔單止教我講對白，仲教我點分析角色同揣摩角色對於故仔嘅功能。同Kent哥拍完每場戲，喺休息時間佢都會講解番場戲點解要咁做；每日拍完一齊食飯，佢又會講番我聽佢嘅相關經驗，同我點樣可以去更好咁裝備自己。」冼靖峰續指，Kent哥連喺休息時間都會搵佢，指導佢某場戲嘅注意事項，又會教佢好多人生道理，用人生經驗教佢去看待自己嘅事業。冼靖峰亦表示即使拍完《神耆小子》，Kent哥都非常關心佢：「拍完套劇我就去咗拍《亞洲超星團》，Kent哥差唔多每兩、三日就同我講加油，問我咩狀況、有冇咩困難？呢啲前輩邊度搵？」冼靖峰分享，覺得Kent哥與自己已過身的爺爺好似，都係佻皮得嚟有威嚴，因此由一開始驚佢變到愈嚟愈唔怕佢。至於Kent哥又大讚冼靖峰係位好用心嘅演員，願意聽意見又主動打破佢哋之間嘅代溝，學習能力快，將來必定前途無可限量。

另外，今套劇《神耆小子》嘅監製王偉仁（Simon）正正係Kent哥著名作品《肥貓正傳》監製，為凸顯Kent哥「錢大海」一角嘅霸道，Simon專誠設計「老虎狗」形象，指Kent哥係成套劇嘅靈魂人物，認為只要Kent哥喺度，所有演員同台前幕後都會寧舍開心同專注，又大讚Kent哥永遠唔會遲到，比通告時間早半小時到做準備，幾十年來都係咁專業。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！