福祿壽訓練學院｜首播被指尷尬又老土 網民：抽咗十幾年水，仲有咩嘢賣？

TVB扮嘢真人騷《福祿壽訓練學院》搵嚟「福祿壽」阮兆祥、李思捷及王祖藍擔任主持，前晚（31日）「福祿壽」三子除咗繼續扮嘢演出之外，仲有多名參賽者落力表演。佢哋仲會化身導師，為留低參賽者進行訓練，尋找扮嘢界嘅接班人。唔講咁多，而家就同大家睇下首播網民反應啦！

尷尬又老土
節目搵得阮兆祥、李思捷及王祖藍做主持，佢哋當然會扮鬼扮馬表演啦！三人喺開場表演以城中話題人物為藍本，扮演「癡情基」、「美B」及「光B」，扮得維肖維妙。除咗佢哋之外，「扮工室助理」陳懿德及郭珮文亦有落力演出。雖然有部分網民覺得好好笑，不過亦有唔少網民認為節目尷尬又老土，留言「有D老人味.....節目感覺好老土」、「好老尷」、「成個節目好X尷尬」、「成個節目都好尷」、「好無聊，有d失望」、「抽在十幾年水，仲有咩嘢賣？」、「成日都做埋呢個咩節目見到都討厭」、「仲有人鍾意睇呢啲扮嘢節目咩」、「我完全唔想睇第2集..」、「現場觀眾 笑係咪有$500收」、「垃圾節目，毫無新意」及「低級趣味！」等等。

李思捷扮嘢了得
阮兆祥、李思捷及王祖藍嘅開場表演中，雖然以王祖藍嘅「癡情基」最吸睛，不過網民就激讚李思捷嘅「光B」演繹最神似，留言話「李思捷 勁似」、 「李思捷扮野的確係有料嘅」、 「李思捷參加中年好聲音應該攞硬冠軍」、 「佢扮人聲係幾勁」及「李思捷最正動作真係似光B 完全無渣流灘」等等。

華dee／Sophia有顏值備受關注
節目一共有50位入圍者，入圍者喺首集已經陸續出場，當中以代號「新會華Dee」嘅陳柏曦及「選美冠軍」嘅2017年國際小姐澳門代表麥嘉欣（Sofia）最被人關注，除咗分別大讚二人演出之外，佢哋高顏值嘅外貌同樣獲讚，例如「華dee 個位好得」、「簽佢啦唱得又有樣 好過吉吉好多」、「上半部似張智霖，下半部似韓東君」、「都有少少似初出道的鄭嘉穎」、「Sophia好正」 、「麥嘉欣好正， 最靚火雞姐！」、 「咁靚女都嚟 似無線搵佢嚟 用呢個節目增加知名度 之後入嚟拍劇」 、「等多半年參加港姐好過啦」

太多藝人參加
節目經過超過為期半年招募，50位入圍參賽者有一半係藝人，例如前天堂鳥成員葉泓聲（Gordon）、伍韻婷（Juliana）及吳兆麟（Alan）等等，唔少網民都認為藝人比例過多，留言「又係tvb人 其實好多都係自己人玩」、「唔夠街外人參加」、「又係 tvb 嘅同事」、「又係 tvb 嘅朋友仔」、「咁多自己人」、「街外人佔入圍嘅有冇3份1」、「咩料 天堂鳥都出動埋」及「冇素人參加咩」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！