秦煌多次跌倒住護老院領綜援 內地愛人未有探望 代女還三百萬不言悔

以加大碼身型深入民心嘅甘草演員秦煌，去年離開TVB後主要接拍內地同香港影視作品演出維生，由於喺內地有物業又不時北上開工，秦煌在港都係租住酒店。近日有傳媒報導，秦煌現時要入住護老院，而且要領綜援，境況令人擔憂。

秦煌呢半年生活出現唔少變化，首先本來佢以月租形式入住酒店，但試過因為腳軟無法拿取食物而餓咗一日一夜。後來秦煌年三十晚在房間「打邊爐」觸發房內煙霧感應器，更令消防員到場了解，酒店因此限佢一個月內搬走。正當要搵地方搬之際，秦煌今年3月喺酒店房內跌倒，要搵圈中老友林偉同劇集監製關永忠幫手報警，入院後有關部門為秦煌安排入住護老院，並申請綜援應付其他開支。秦煌自言對護老院生活適應良好，膳食都算滿意，只係唔多鍾意聽到護老院成日播張偉文啲歌。而近月減磅不少嘅秦煌，仍然希望繼續有戲拍。

秦煌本來喺深圳住，但因為疫情封關要留港住酒店，同時開工減少，手停口停之下積蓄所剩無幾，卡數都無錢還之餘甚至要問林偉借錢。另一方面，自言同仔女關係淡薄嘅秦煌，原來多年來為大女還債，更為此將香港物業出售「撲水」，前後拎咗300萬俾大女，但係現時大女兩夫婦同秦煌甚至其他弟妹失去聯絡，不過秦煌強調做爸爸當然會想救咗個女先。而之前喺訪問聲言想同仔女改善關係之後，秦煌嘅細女主動聯絡爸爸並不時探望。

至於秦煌喺內地嘅情人知己、年輕佢36年嘅Mary，即使兩地疫後通關多時，至今仍未來港探望，就算平時講電話都係秦煌打俾對方多。秦煌話係佢叫Mary同埋與秦煌冇血緣關係嘅女唔好落嚟搵佢，因為車票觀光開支唔少，而Mary多年來無收入，都係靠秦煌俾錢照顧。秦煌仍然深信自己冇睇錯人，甚至想再有收入時再俾錢供養Mary兩母女。

原名梁溢成嘅秦煌，28歲時因為任職商台主持人嘅太太莫佩雯介紹而認識商台創辦人何佐芝，繼而有機會參與佳視《射鵰英雄傳》試鏡而入行。秦煌七八十年代喺佳視及TVB分別拍過《射鵰英雄傳》，都係由秦煌飾演周伯通，老頑童形象深入民心。1992年嘅處境劇《卡拉屋企》，秦煌飾演嘅肥舅父（廖仲德）亦都係佢嘅代表作。

秦煌2008年喺長洲飲完酒坐渡輪出市區時喺碼頭跌落海，頭部撞到木樁受傷一度昏迷，要由直升機送院搶救，一度入住深切治療部，好在後來康復出院。到2020年，秦煌喺電視城門口「差錯腳」跌倒令膊頭骨裂而要送院。

秦煌同分居多年太太莫佩雯育有4個仔女，但秦煌自言年青時以為照顧到屋企物質方面就夠，唔係開工就去咗玩，因此同家人關係麻麻，莫佩雯多次提出離婚都被秦煌拒絕，而莫則於2017年逝世。

北上居住深圳20年嘅秦煌，曾自爆搬上去住嘅時候，搵咗個20歲女仔幫佢打理家務，呢個女仔後來成為佢嘅「情人知己」Mary。秦煌話叫過Mary走，但愛人冇理會，仲將買餸錢「打釜頭」儲起，加埋秦煌資助嘅幾十萬喺家鄉湖南買咗樓，秦煌疫情前住深圳時，愛人會坐高鐵由湖南落去搵佢。交往多年，Mary曾經向秦煌提出想生小朋友，秦煌表明拒絕，但唔介意對方用自己方式有小朋友。後來Mary懷孕並誕下一女，個女11個月大嘅時候兩母女落去深圳同秦煌生活。而家Mary個女8歲，秦煌視如己出，希望搵到錢供繼女讀書。秦煌直言冇過問繼女生父是誰，Mary亦冇提過。

去年離開TVB後，秦煌接吓中港兩邊走參與演出搵食，自言勉強夠使。舊年秦煌同另一TVB舊人林偉見面，林拍片分享上小紅書，片中林偉笑秦煌「好大陣『老煌除』」，仲問佢有冇沖涼。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！