「Paco巨星飯堂」嘅嘉賓層面廣闊，我上期邀得香港桌球好手傅家俊，今期就請嚟應屆保良局主席梁寶珠女士，以及其愛女、著名品牌卡地亞高級珠寶部總監林玉茵（Maya）擔任嘉賓。呢個陣容，喺挑選地點上我梗係更花心思，梁主席同Maya都盡心盡力行善，巾幗不讓鬚眉，我特別為佢哋揀選咗位於灣仔嘅「鴻星海鮮酒家」，一嘗餐廳特色嘅「三國宴」，有晒英雄（雌）本色。

令我更加開懷嘅，係梁主席欣賞我以酒會友嘅作風，一面同我暢飲，一面細訴行善嘅喜樂。乾！

我與梁主席（左）及Maya（右）品嘗特色「三國宴」，把酒談歡。

推己及人

香港人出名善心爆棚，所以香港嘅慈善服務團體亦特別多，其中保良局喺1878年成立、以「保赤安良」為宗旨，算係香港慈善服務團體嘅先鋒兼中流砥柱。梁寶珠係今年（壬辰年）保良局嘅主席，佢加入保良局已經有12年，一直視造福貧苦大眾為己任，梁主席上任後最大心願係希望改善保良局嘅醫療服務。

至於當初何以加入保良局？梁主席都有親自解說：「保良局一向好深入民間，喺六間慈善機構裏面，算係數一數二，可能係上天安排啦。78年我喺內地做生意，認識咗好多人同慈善機構，嗰時都捐咗好多錢，去貴州山區興建學校。後來有朋友同我講：『你成日都捐錢返內地，不如都幫吓香港啲貧苦大眾。』

「呢句說話深深咁打動咗我，一直到千禧年喺一個Party度，嗰屆主席李張慧美主動邀請我入局，就係咁，我就加入咗保良局。」

梁主席（左）、Maya（右）母女二人面對精美菜式，先餵飽iPhone。

梁主席喺上個月正式就任，佢認為宣傳推廣工作喺目前對保良局係相當重要，今晚佢同我講，保良局舉辦咗兩年多嘅「社區飯堂」服務，外界一直冇留意，支持力量自然唔夠。一聞此言，我就決定到飯堂一趟，希望身體力行，支持呢項咁有意義嘅慈善服務。

「我喺就職嗰日都講，保良局真係好需要傳媒朋友，將我哋服務訊息推廣出去畀大眾知道，外界仲以為我哋只係搞孤兒院，其實香港依家冇孤兒，只係有破碎同問題家庭，外界根本唔知，我哋喺教育同老人服務都做得好出色。好似『社區飯堂』咁，其實我哋喺2010年已經開始做，服務一啲有需要嘅人，等佢哋可以只係畀兩蚊一餐早餐、十蚊一餐午飯同晚飯，每餐有兩餸一湯。」

前菜八陣圖（$250），不論賣相與味道也在水準之上。

甜品亦命名八陣圖（$32），實為杏汁及芝蔴糕。

點心草船借箭（$32），製作精美。

名師傳藝

推廣之外，梁主席實事求是，喺任期內有唔少目標計劃，除咗希望可以推廣傳統中國藝術粵劇之外，仲會喺醫療方面有一連串計劃，希望服務對象可以得到更全面嘅保障。

「我哋首先會成立一個醫療中心，因為以往嘅服務對象係有需要先去睇醫生，一定唔夠全面同持續性，如果我哋有自己醫療中心，駐院醫生就可以睇番我哋啲服務對象。另外，中心仲準備有埋專科服務，因為政府醫院一般專科服務要輪候一年或以上，如果請專科醫生嚟醫療中心義診，由我哋駐院醫院轉介，對我哋服務對象就會更全面。

「我哋仲會籌辦一個醫療手術基金，因為輪候政府醫院太耐，我哋希望幫到部分手術費，等服務對象可以去私家醫院做手術，咁樣就可以救到多啲人。始終救一個人，就等如救咗一個家庭。」

梁主席同我暢飲茅台，睇我隻拇指就知道佢酒量非淺。

廚藝上，梁主席亦有鑽研，佢正以手比劃鮮鮑份量。

梁主席以行善為己任，今晚佢仲同我講咗一個小秘密，其實佢本身係一名廚藝高手，「年輕啲嘅時候，我跟一個名師學廚，好多中菜我都識煮，最有滿足感係有一次燜鮑魚，我用鮮鮑製作，但係都做到嗰種溏心嘅效果，把刀切落去都係黐住刀邊嘅，我嘅朋友仲以為係用乾鮑整嘅。」

哈哈哈！我都希望有機會一嘗梁主席出神入化嘅廚藝，而Maya自然對媽咪嘅廚藝讚不絕口：「呢方面我就冇媽咪咁叻嘞，佢煮一啲難度高嘅菜式都冇問題，我自己就只係識煮西餐，因為製作過程冇咁複雜吖嘛。」

三國鼎立（$288）係用三種唔同嘅方法烹調肉蟹，做出三種口味。

火燒赤壁（$150）為紅糟肉米蒸中蝦，以乾冰營造氣氛，未食先興奮。

母女同行

Maya自謙喺廚藝上不及媽咪，但係喺行善上，佢就遺傳咗梁主席嘅善心DNA，仲積極追上媽咪步伐，母女同心，行善最樂。身為香港青聯賢慧社副主席嘅Maya，致力為一眾未來社會棟樑服務，「我好鍾意小朋友，佢哋將來係社會棟樑，而自己家庭觀念好重，我都因為受到媽咪薰陶而自小參與慈善工作，幫助有需要嘅人。

「所以，青聯賢慧社有舉辦『青聯賢慧愛家日』，畀一啲低收入、單親家庭或少數族裔家庭嘅小朋友，同家長免費到海洋公園玩一日，喺過程入面，一方面帶出保育嘅重要性，另一方面就啟發小朋友孝順父母同尊敬長輩嘅心。」

Maya遺傳咗梁主席嘅善心同毅力，成為年輕一代嘅慈善家。

我今晚以威士忌同茅台會友，梁主席（左）同Maya（右）都盡興而回。

三顧草廬（$115）為三國代表性事件，呢道以三味丸子伴炸茶樹菇，表現出箇中精髓。

小菜又名草船借箭（$110），包含孜然小蝦件同鹽酥小魚。

甜點桃園三結義（$30），以關羽、劉備及張飛形嘅包點，分別係棗蓉、奶黃同蔴蓉。

鴻星海鮮酒家

地址：灣仔港灣道8號瑞安中心1樓
電話：2628 0989

東周網 - 積善成德︰http://www.eastweek.my-magazine.me/index.php?aid=19748