第42屆金像獎｜《毒舌大狀》榮獲10項提名 眾入圍演員分享感受 吳煒倫導演: 所有演員獎都入晒

第42屆金像獎今日公布入圍名單，電影《毒舌大狀》獲得今屆金像獎10項提名，以下為各入圍者的文字或錄音感受。

獲提名最佳導演、新晉導演－吳煒倫導演: 所有演員獎都入晒，我好開心~

獲提名最佳男主角－黃子華：好開心，多謝大家支持！

獲提名最佳女主角－ 王丹妮：

剛剛收到消息，喺今屆金像獎獲得最佳女主角嘅提名，我自己冇估到，覺得好驚喜。今年有好多好出色嘅電影同角色，自己好榮幸可以同咁多位出色嘅人一齊獲得提名，我好感恩。一定要多謝安樂電影，多謝江老闆，多謝監製Ivy，同埋導演Jack，好多謝佢畀呢個機會我，去演呢個咁有挑戰性嘅角色，好多謝拍攝團隊嘅每一位，我好感恩可以同團隊裡面嘅每一位一齊共事。《毒舌大狀》能夠有咁好嘅成績好多謝每一位入戲院支持嘅觀眾。毒舌嘅每一位都好努力，能夠拎到咁多個提名，我好希望導演、子華，Fish，Renci，君豪哥都可以攞到獎，另外亦都好期待可以同《毒舌大狀》嘅團隊一齊行紅地毯，去感受今次嘅盛事。
宜家嘅我正身處多明尼加共和國，雖然好遠，但都感受到大家滿滿嘅愛同支持，毒舌係我第二部電影，大家見證住我嘅成長。所以好多謝大家，我會繼續努力。

獲提名最佳男配角－ 謝君豪：

好開心！
多謝所有投票畀「金遠山」的電影人，
《毒舌大狀》喺舊年年初上映時得到很好的成績，
之前亦剛剛亦憑呢個角色拿到新時代國際電影節最佳男配角，
多謝大家支持！好開心，另一方面好刺激，
因為今年男配角提名高手如雲，能夠有份提名，與有榮焉。
多謝導演吳煒倫寫左一個咁好嘅劇本，
同埋俾一個咁好嘅機會我去演繹呢個角色，
今次《毒舌大狀》獲得10項提名！
真係好開心！
我會繼續努力，多謝！

獲提名最佳女配角－楊偲泳：

感恩！希望大家可以一齊上台，我真係好愛好愛毒舌呢個family！！

獲提名最佳女配角－廖子妤：

「呢部戲真係對我嚟講，係其中我演藝事業一個幾重要里程碑，《毒舌大狀》除咗喺票房上得到好好成績，同埋而家喺金像獎，又獲得咁多項提名，真係好開心，我哋團隊當時拍攝時候合作氣氛都係好開心，每日大家返去啊就係講個劇情，點樣去做得好啲，點樣去完成個角色，大家相處又非常之開心，我覺得首先我真係要多謝江志強老闆，因為佢已經畀咗好幾次機會我，好幾次都係好好嘅角色，上次我憑《梅艷芳》攞獎啦，今次《毒舌》啦，好多謝安樂電影，好多謝導演Jack吳煒倫，因為佢可以有提名，我真係非常開心，因為同導演合作得好愉快，我喺導演身上係得到好多力量，同埋要多謝我啲對手，我真係好開心子華可以有個影帝嘅提名，跟住my friend我好姊妹王丹妮，同埋Renci，合作都真係非常之開心，我好期待我哋一齊著得靚靚，一齊去行紅地氈，一齊去享受金像獎嗰一日。」