節目狂播 為谷內地劇？《號手就位》主題曲登上港台冠軍

自從政府委任李百全負責掌管香港電台嘅廣播處長一職之後，港台節目上出現唔少改變，電台方面《瘋show快活人》原主持貴花田同埋曾志豪被炒魷，換上多年前主持過《瘋》嘅梁繼璋、李麗蕊同馬小強；電視部就喺6月尾腰斬一至五晚嘅《日常8點半》，改為播放內地劇集《號手就位》。

咁啱得咁蹺，今個星期港台《中文歌曲龍虎榜》冠軍歌，就係由張杰主唱、《號手就位》主題曲《向前衝》。首歌上榜5星期後，今個禮拜連升15級登上冠軍寶座。以往港台都會力谷自家活動例如《太陽計劃》主題曲上榜造勢，但係港台電視劇集歌上榜兼拎冠軍就比較少見。唔只全力支持拎冠軍，根據facebook專頁《音樂禧ter》帖文，港台第2台上星期唔少節目都播過一次《向前衝》，而呢排新任2台台長上任，仲暗示「唔知係咪落恆order支持呢首咁出色嘅作品呢」。

今年4月喺內地首播嘅《號手就位》改編自長篇小說《畢業了當兵去》，講述4個大學畢業青年參與解放軍「火箭軍」嘅故事，男主角有內地一線小生李易峰，女角就有吳卓羲舊愛張馨予，而劇集出品單位就包括解放軍火箭軍政治工作部宣傳局。早排特首林鄭月娥回答記者提問時就話冇睇ViuTV大熱劇集《大叔的愛》，反而推薦《號手就位》，仲形容套劇「好勵志、好正面」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！