《約會時，麻煩放低部電話》

依家嘅人出街都係機不離手，甚至出街同朋友食飯都係望電話多過望同檯嘅人。一大班人都還好，起碼唔同你傾計都仲可以同其他人傾。但去到得番兩個人嘅約會，就真係唔好再掛住望電話，難得兩個人抽時間出去，就珍惜一下約會時光啦！

有時出街見到啲男人喺度不停望住電話打機，個女朋友就企喺隔離，做咩啫，打機打少幾個鐘唔會死㗎，但個女朋友會走㗎！男人永遠都覺得自己有一邊打到機又一邊聽到女朋友講嘢嘅超能力，但其實無㗎！於是女人就會覺得自己不被尊重不被聆聽⋯⋯我有時同男朋友出街食飯，佢喺度睇facebook，我同佢講嘢佢永遠有delay，又會答埋啲九唔搭八嘅答案，於是我就會用硬功話佢或者又軟功嗲佢放下屠刀，同我傾下計啦，因為同個無靈魂嘅人講野，真係好無癮！

利申：同男朋友出街我真係可以全日淨係望幾眼有無重要whatsapp，其他時間我都唔會玩電話，出完一日街電話都仲可以有80%電。因為我非常珍惜約會嘅時光，而更重要嘅係，我要求人尊重我之前我會先表現尊重，希望大家出街唔係「交功課式約會」，而係一齊放眼番喺現實世界，一齊傾下計、笑下前面啲路人、討論下間鋪頭件衫⋯⋯咁樣嘅約會先至有番啲質素嘛！