純粹港嘢：怪到極致一定會出名架，但然後呢？

感覺每隔一段日子，香港就會有一個靠奇怪、靠與眾不同一夜成名嘅人。唔知仲有幾多人記得張如城同孔慶翔？又有幾多人閒唔事會諗起Faith、FFx？

港男未正式開戰，但落選者Jason曾世龍就憑住日本動漫《寵物小精靈》嘅男主角「小智」造型，成功引起關注同討論。呢兩日見到好多朋友係Facebook轉一段由佢主演，關於「堅持夢想」嘅廣告片。條片嘅廣告對白度得好好，配合哂「小智」嘅出名經過去講「有夢想、肯堅持就唔怕輸」，令到佢參選港男呢件事突然變得好勵志。

但Jason除左靠搶眼造型搏出位之外，我真心睇唔出佢有比起其他參賽者努力係邊，至少有好多去選港男嘅人真係練好左六舊腹肌先參賽，而佢淨係帶著兩個精靈球去，就諗住可以收服評判嘅心。

如果佢當初真係就咁入圍左，我唔會覺得勵志，反而感覺對一班真係有為夢想努力過嘅參賽者好唔公平。筆者識得一位大學師兄有面試應屆港男，見到佢為左練好身形，由好耐之前起已經節食、日日做運動、面試前一日淨係飲水。係我眼中，呢D先係真正用行動去為夢想努力嘅人，唔係淨係得把口。

或者係呢個需要嘩眾取寵嘅年代，默默努力唔一定會成名。但係如果本身完全無實力、無才華、無表演或創作能力，就算真係靠騎哩出左名又點？觀眾第一次見到有人著到「小智」咁去選港男會覺得好新鮮，但下次如果Jason真係以「比卡超」造型再次參選，仲係咪有咁多觀眾會繼續關注佢？

有自己嘅特色，靠與眾不同嘅形象去成名呢個方法冇問題，好似香港100毛旗下嘅藝人Dickson，佢賣毒男身份，以22戰22敗嘅獨特追女技巧成為「愛情專家」，但佢唔係一味賣毒男造型，配合成名嘅仲有才華。Dickson抵紅，係因為佢識得點樣演出自己嘅定位，識得度橋、創作同真係有文字功底。

近年因為越黎越多企業品牌願意係社交網絡平台，例如 Facebook、Instagram、微博等等落廣告，尤其係內地，只要你夠出名、夠「紅」就會有機會賣廣告賺錢。所以出現越黎越多好似蛇精男刘梓晨、蛇精女李蒽熙、鄉土走音組合sunshine等等，打響左頭炮出左名，但明顯無實力嘅所謂「網紅」。

內地仲有一個apps叫「快手」，相信應該無咩香港人聽過，但如果提起「電鑽食粟米剃頭女」，可能好多人都有睇過個段片。女事主就係「快手」其中一個主播，叫劉嬌嬌。

「快手」裡面嘅用家主要靠上載奇人異事視頻搏出位。呢個 Apps 裡面只有你諗唔到，沒有佢地做唔出嘅怪事。為左博出位，連大媽們都去到好盡，有靠食燈炮、蠕蟲、玻璃出名嘅河北大媽、有不斷去唔同地方放鞭炮入底褲自爆嘅民工、仲有各路生食死豬、生吃蛇嘅青年，同埋靠扮大人食煙飲酒出位嘅八歲肥仔。

論怪，真係幾時都可以有人比你更加怪。

但敢與眾不同就真係代表勇於追夢咩？個人黎講，我真係唔特別表示認同，因為唔想以為每次打開 Facebook，都係蛇精男類人物一直飄過。我認我膚淺，比起呢類靠標奇立異一時爆紅嘅人，我更願意睇多幾次盤菜瑩子，最少視覺上黎講真係好睇D囉。

純粹思考題：好多例子證明騎呢過後，就算人人識你唔代表人人都鐘意你，真係壞新聞好過冇新聞？有人笑好過冇人識咩？

TEXT / Diana CHIU

( 圖片來源：http://www.wfcmw.cn, http://fun.youth.cn, http://twimg.edgesuite.net)