12歲偷睇AV 為圓夢自薦 素海霖首次拍AV深感女優受尊重

日本AV片商Faleno宣布起用首位港產女優，KOL素海霖（Erena）以「絵麗奈」藝名將於4月推出首部作品，瞬即成為香港話題！消息一出，素海霖已經接受多家本地媒體專訪，分享入行及拍攝過程。

素海霖本身做youtuber時都已經夠大膽，而家成為AV女優後亦坦白承認12歲已經接觸到AV，更明言投身入行係因為喜歡性愛。Erena近年更希望加入AV行業，呢一年幾正式向夢想進發，甚至發夢都見到自己拍AV。佢多次向台灣同日本片商自薦都未成功，最後係靠台灣嘅製作公司介紹而得到機會。素海霖好醒目地同片商講，自己成功入行就會成為首位港產AV女優，夠晒話題性，即使銷量麻麻都會令公司更多人識。

呢套「處女作」已經完成拍攝，前後拍咗6日，「戲份」會分成2套作品推出。開工前，素海霖同片商用4個月時間商討拍攝細節，但並無特別瘦身，而正式開鏡前佢特意睇AV學嘢，但係導演反而建議唔駛，寧願佢真情流露。Erena去到現場先知著名男優清水健係對手，令佢相當驚喜，並且大讚對方拍攝期間會提點。而日本AV界對女優嘅尊重亦令素海霖印象深刻，現場人員會提醒佢如果有咩唔舒服可以開口叫停，唔駛怕阻人收工。Erena亦試過有2次因為身體疼痛而叫停。

能夠夢想成真素海霖當然覺得興奮，但拍完之後感覺有80分開心，因為畢竟都係工作。成為話題人物，Erena表示事前冇同父母講起會拍AV，而尋日家人仲未搵佢，可能係顧及佢要處理好多事，亦希望父母會了解。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！