細細粒激減121磅獲網民自薦做另一半 澳洲超市被野生捕獲揭真實身形？

38歲陳嘉佳（細細粒）自約滿TVB後轉戰內地擔任「吃播主」，靠美食食出名堂，佢曾透露自己每日直播7個鐘，有時食到唔想食都要夾硬食，體重高峰期曾達287磅，唔少網民都替佢健康感到擔心。不過，細細粒去年開始積極減肥，半年左右激減121磅，身形瘦足幾個圈，不但著到泳衣、吊帶衫露鎖骨同膊頭，就連臉部輪廓都出晒嚟，網民大讚細細粒本身五官就靚，瘦咗之後更瘦，又有網民留言指有啲似郭羨妮同年輕鞏俐嘅味道，細細粒又於社交平台分享接受媒體訪問嘅封面照，封面中引述細細粒想識男仔嘅說話：「有男仔唔該介紹下」，有網民就留言自薦：「妳好陳小姐，恭喜減肥成效，我睇咗Youtube，我都係一個獨子，父母都現在已經80幾同90頭，我已經離婚四年！父母驚佢哋走咗後只有我自己一個，所以我都嘗試自薦俾妳！唔知道是否天真妄想？我都想有機偶識到另一半到老，妳可以當我痴心妄想。」

細細粒表示目標要減到去120磅，期待冇咗一截截肥肉嘅自己，但最後嗰35磅係最難：「家族肥胖的我，基因肥胖的我，多囊及胰島素抵抗的我，這次減肥是真不容易，我要比任何一個減肥的人更難成功減肥，但我已進行到一半，最後的35磅，也是最難的…我要更加努力. 細細粒，加油。」細細粒曾接受訪問時表示天生已是大胃王，今次減肥係因為老闆王祖藍於佢去年生日送咗個7日福州減肥營畀佢，另外係因為唔想自己早死過70歲嘅媽媽；據悉，細細粒年前曾因急性糖尿病暈眩入院，透露出事時糖尿23度，即使打咗胰島素僅降到15度，咁落去驚捱唔過50歲，因而決心減肥。

近日，細細粒到澳洲出席保健食品品牌新品發布會，順道旅行影靚相，咁啱被網民於超市野生捕獲並將生圖PO上社交平台，細細粒嘅身形又惹熱議。該網民表示一開始認唔到細細粒：「第一次在Eastwood看到貌似TVB演員的，突然不知道怎麼做，應該要給她購物的空間嗎？還是上前跟他說：不如吃自助餐咯？我選擇了前者，因為她減肥太成功了，我上車後才確認，而且她比我想像高，而且普通話超好！比起港普藝人的普通話純正太多了！」即使該網民指細細粒減肥成功，但從照片看到，著上白色連身短裙襯拖鞋嘅細細粒仍肚凸凸，明顯唔同佢喺社交平台PO嗰啲相，網民感到驚訝反問：「她不是瘦了嗎？」、「沒看出來瘦了」、「好似無減過」，更有網民直言細細粒身形奇怪：「不覺得她瘦的很奇怪嗎？臉還是肥就有些瘦有些沒有，不像賈玲那種正常的，估計她是吃減肥的」、「佢呢種望落不似健康嘅瘦」、「這樣不健康，肚子大，內臟脂肪高」等等，該帖主就回應指：「老實說她狀態不好，可能是工作到很晚的感覺，真的瘦了很多，不過當然不是像直播那種瘦。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！