細貓應智越專訪｜出演音樂劇心理關口係講粗口同感情戲？ 暫拒再開騷：唔希望太「速食」

曾於韓國做練習生，之後喺2018年參加《全民造星》奪得第7名，再喺2020年以獨立歌手身份出道嘅應智越（細貓）今年真係百足咁多爪，上半年已經出咗3支單曲，仲同古巨基（古Sir）合作翻唱作品《心跳回憶》。除咗音樂方面，今年佢亦都出演音樂劇《得個夢、冇銀用》，又同鄭裕玲（Do姐）拍旅遊節目，佢仲透露自己同Do姐嘅其中一個共通點，又話自己唔想開騷住，究竟點解呢？

出演音樂劇《得個夢、冇銀用》 心理關口係講粗口同感情戲？

《得個夢、冇銀用》講述嘅係Band友追夢嘅故事，對歌手出身追夢多年嘅細貓嚟講角色非常貼切，不過原來當中都有要突破嘅心理關口，就係講粗口同感情戲。外表斯斯文文嘅細貓就指自己本身好少講粗口，唔想成為自己嘅習慣：「平時就唔講，廢事慣咗，唔想俾自己慣咗會衝口而出，所以自己基本上係唔講」。不過佢就話因為導演同編劇有寫喺劇本，為咗保持專業喺排戲演出都有照講。

至於，另一個心理關口就係感情戲。細貓透露要拿捏感情戲同女主角（陳伊霖）嘅互動好困難，再加上以前拍MV、電視劇等等可以靠借位就角度，但係舞台劇就要直接去攬住對手：「攬得多又驚俾人覺得唔舒服，攬太少又驚導演會鬧『你可唔可以認真啲俾多啲感情去演？』所以當初難拿捏，要同對方溝通點去做令件事更好」 。細貓亦都自爆當初拍第三個MV，同鄧月平（Larine）對戲嘅時候淨係攬戲就起碼拍咗15分鐘，攬得尷尬之餘個樣又尷尬，驚俾人覺得藉住拍戲抽水，最後好彩有Larine Lead住先順利完成。

追夢之路未想過放棄：都經歷過「地獄」

講起追夢之路，一出道就撞正Covid，成個樂壇、成個社會都陷入低潮，不過細貓就冇諗過要放棄：「的而且確頭兩年Covid影響咗好多，都經歷過『地獄』啦，宜家已經叫好好。好老實出道嘅時候已經係Covid，嗰下就會諗原來做音樂係可以咁搵唔到食﹐但係其實宜家大家都知嗰段時間市道好差，宜家叫好咗，自己嘅精神狀態都叫好返啲」。細貓亦都笑言當時有諗過搵工，但係以失敗告終：「當時發現做音樂搵唔到食，不如試吓去搵工，但係發現死啦都唔請人，仲反而炒人添」。 所幸疫情過去，細貓都直言現時算穩穩陣陣，養得起自己同團隊，希望可以令團隊有更舒適嘅環境。

暫時未想再開騷 我唔希望太「速食」

因為Covid嘅原因，細貓就話有唔少計劃都被逼擱置，不過演唱會竟然係佢暫時唔太想做嘅事？細貓提到自己第一次演唱會用一個多星期練足26首歌：「可能係香港嘅文化，我得一至兩個禮拜準備26首歌，我唔希望咁『速食』，講得冇咁好聽係叫『速食』，因為喺韓國Suppose練一隻舞個幾月先拍MV，點解人哋跳得咁好跳得咁齊，人哋真係有花時間去做。我唔想有一個惡性循環，可能觀眾睇完我第一個騷 Feedback都幾好，但係自己內心其實有少少係打以前練習嘅功夫，我係好想精心去做好呢26首歌。當然租場又係錢啦，搵人練舞又係錢啦。」

細貓亦都補充香港歌手前輩擺喺舞台演出嘅心機好值得學習，比較韓國同台灣音樂會模式，香港歌手嘅舞台花更多心思；韓國歌手相對練習為主，演出整齊，但舞台變動較少；台灣歌手歌藝十足，可以稱為「行走的CD」，但係就比較少Re-arrange，可能頭幾首會好震撼，但慢慢就會有少少盲目感；相反以張敬軒（軒公）為例嘅香港歌手，會喺舞台、燈光，甚至係曲風等等都會有諗法同Re-arrange，俾到更多驚喜觀眾。所以，對於自己未來嘅音樂會，細貓就希望：「做到俾觀眾有驚喜，而唔係就咁用26首MMO出嚟唱，唔想俾人覺得冇乜變動冇乜驚喜。」

同Do姐合作到韓國拍旅遊節目 幫Do姐解難拉近距離

早前細貓亦都同Do姐合作到韓國拍旅遊節目，因為受韓國輩份文化影響，再加上睇返Do姐以前嘅作品，本身都幾緊張：「本身都覺得Do姐好嚴格，因為睇佢嘅節目同戲劇，角色都係訓話同高高在上嘅感覺，好似佢搭住農夫會話：『你兩隻嘢』 ，但係實質佢係好Nice，又會整蠱吓我咁樣其實都幾有趣。」喺旅程中，細貓仲幫Do姐解決咗一個問題，原來就係幫Do姐揀咗可以將手機駁落電視嘅電線，仲唔小心 曝露咗自己嘅慳家性格，幫Do姐格價，展示搞笑一面。 不過講到同Do有冇咩共通點，細貓就覺得係自律同對自己有要求，例如保持自己身型同體態，逼自己控制飲食同運動。

延續媽媽音樂夢 望與哥哥雙劍合璧拍戲

對於一直堅持歌手夢嘅其中一個原因，原來係嚟自細貓媽媽。細貓透露媽媽曾經講過以前都有讀音樂嘅機會，不過因為養家被逼放棄夢想，所以希望可以繼承媽媽嘅目想。另外，細貓有另一個目標就係同任職電影幕後嘅哥哥合作，所以希望令自己進步，更加有成就，他朝有日可以合作：「宜家咁做就叫『圍威喂』，他日兩個有成就就叫『雙劍合璧』」。