網民票選「2023最喜愛翡翠台劇集」TOP10！ 有劇集被指男女主角冇火花？

討論區嘅一班網民不時發起男神、女神選舉，以一人一票票選心中所支持嘅嘅男女星；日前，有網民就以劇集為題，出PO叫大家投選3套2023年最喜愛嘅翡翠台劇集，樓主亦喺選項中特別標明女主角名單，結果共選出10大最喜愛嘅劇集，不過有部分網民就對結果有意見，同時由於TVB今年僅播出11套自家原創劇或合拍劇，所以其實排喺尾嗰幾位接近墊底貨，一齊睇吓名單啦！

第8至10位：《有種好男人》、《黃金萬両》、《新四十二章》
《有種好男人》、《黃金萬両》及《新四十二章》並列網民最喜愛劇集第8至10位。《有種好男人》由馬德鐘和李佳芯主演，劇情算係一般溫情小品劇嘅套路，李佳芯拍完呢套劇後就未見有其他劇開工。《黃金萬両》就係賀歲短劇嚟，被安排於年三十晚至年初八播出，演員包括薛家燕、曹永廉、麥美恩、黃子恆、朱智賢、馬貫東、江嘉敏等。至於《新四十二章》由陳豪、龔嘉欣、江嘉敏、周嘉洛、鄺潔楹等演出，劇情題材新穎，又將龔嘉欣塑造美人生鬚形象，相當搞笑。

第7位：《法言人》
《法言人》演員包括馬國明、林夏薇、張頴康、黃嘉樂、何依婷、丁子朗等，以法律行政人員（師爺）作題材，《法言人》於帖文中以7.14%票數獲第7位，不過其實當時劇集播出時曾被網民力數劇情拖拉，例如案例其實可以一集就講完，又指選角方面卡士較弱，男主角又係老是常出現嘅馬國明，表示睇嚟睇去都係佢咁。

第4至6位：《隱門》、《靈戲逼人》、《寵物Pet Pet》
《隱門》、《靈戲逼人》、《寵物Pet Pet》均得到10%票數，並列第4至6位；《隱門》由陳展鵬、黃智雯和湯洛雯領銜主演，又有吳岱融、魯振順等老戲骨，劇情懸疑奇情，女主角黃智雯因隱瞞自己係殺人兇手而逐步黑化，被讚演技大爆發。《靈戲逼人》就由張振朗、龔嘉欣主演，係TVB久違以靈異為題材及譜寫人鬼戀嘅劇集；《寵物Pet Pet》亦以少見嘅獸醫診所題材作故事主線，由林夏薇和周嘉洛飾演獸醫及動物傳心師，雖然二人首度合作極具新鮮感，但就被指無太大火花出現，難代入情節當中。

第3位：《破毒強人》
網民最喜愛劇集第3位係啱啱喺上周五播出大結局嘅《破毒強人》，跨平台直播收視最高達26.9點，係劇集收視之冠。《破毒強人》由陳豪、蕭正楠、胡定欣及張曦雯領銜主演，網民就大讚飾演啞巴外送員徐安樂嘅何廣沛及演繹網台記者林可兒嘅張寶兒拿揑角色好好。不過，樓主覺得《破毒強人》未能得到更高名次係因為陳豪演最大反派能力過高，但正派就慢人一步，大呼未夠過癮。

第2位：《一舞傾城》
《一舞傾城》以17.14%票數得到第2位。《一舞傾城》由王晶監製，集結陳法蓉、姚子羚、蔡潔、陳星妤、文凱玲、鄺潔楹、傅嘉莉等女星，並以八、九十年代尖東舞廳做背景，講述一班舞小姐於夜店嘅人生及愛情經歷。劇集於開播前已強調內有不少強姦、群毆、SM虐打、掌摑等情節，又表明係參考台劇《華燈初上》製作，未播出已惹來熱切期待。雖然話題十足，但當時就有有觀眾批評劇情老套低俗，更指劇集存在相當多穿崩位。

第1位：《隱形戰隊》
《隱形戰隊》以21.43%票數得到第1位，演員包括馬國明、唐詩詠、陳展鵬、陳山聰、劉穎鏇、劉佩玥、江美儀、林子善等人；以隱形任務戰略部隊及反恐特勤隊為主題，劇情緊湊因此吸引好多觀眾追劇。當中，劉穎璇飾演反恐特勤隊唯一女隊員刑風，除咗貼身小背心上陣令觀眾激讚傲人上圍與結實腹肌，又被指有潛力演打女。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！