羅淑佩談追星稱好自然、質疑外界反應太大 年輕時鍾意譚詠麟「佢全部碟齊晒」

【本文獲 獨立媒體 授權轉載】

【獨媒報導】房屋局常任秘書長羅淑佩是MIRROR 成員陳卓賢的粉絲，她接受恒生大學傳播學院訪問談及其追星，認為是好自然的事，並透露在成長及讀書的時候，是譚詠麟、張國榮、陳百強及Beyond的粉絲，質疑外界反應太大：「講出嚟好似第一發現新大陸咁。第二好似咁奇怪嘅，一個我咁嘅年紀，做我呢啲工嘅人，原來好似唔係好應該鍾意一個比較年輕啲嘅香港嘅歌星或者歌手，係咁嘅咩？唔係不嬲都講俾人聽，我後生鍾意譚詠麟㗎喎！我到宜家佢全部碟齊晒㗎喎，所以我又覺得好自然啫。」

羅淑佩接受恒大傳學院《恒傳訪問》，談到任房屋署署長的壓力，指自己在公屋長大，「有啲嘢唔使重新學」：「呢個位係返番嚟做一個，我認為，可以少少嘢都可以帶俾好多年有一個改善啦，改變生活，甚至生命嘅一個政策範疇，我好開心。」她稱喜歡「食嘢」及煮食減壓，在農曆新年會整蘿蔔糕，中學同學更會拖男帶女在年初三到其屋企「食糕」。

主動提及追星 羅淑佩：講出嚟好似第一發現新大陸咁

在訪問中，羅淑佩主動稱「大家都可能知啦」：「我都會得閒去睇吓 concert啦。」談到其Hellosss（陳卓賢粉絲專稱）身份及追星，羅淑佩先反問：「其實唔明點解宜家唔話俾人聽，鍾意邊一個星㗎噃？」她指母親的一輩如喜歡陳寶珠、蕭芳芳、任劍輝及白雪仙：「係人都知㗎喎，我係邊個嘅迷。」

羅淑佩稱在成長及讀書的時候，已喜歡譚詠麟、張國榮、陳百強及Beyond：「係人都知㗎喎！我鍾意佢哋又係人都知㗎喎！咁點解到宜家，我幾廿歲嘅時候，我譬如鍾意Ian 咁樣，嘩，講出嚟好似第一發現新大陸咁。第二好似咁奇怪嘅，一個我咁嘅年紀，做我呢啲工嘅人，原來好似唔係好應該鍾意一個比較年輕啲嘅香港嘅歌星或者歌手，係咁嘅咩？唔係不嬲都講俾人聽，我後生鍾意譚詠麟㗎喎！我到宜家佢全部碟齊晒㗎喎，所以我又覺得好自然啫。」

另外，羅淑佩表示年輕偶像除了聲色藝，亦應該宣揚正面的訊息給社會作榜樣。她特別推薦陳卓賢的歌曲《地球上的最後一朵花》，當感到孤獨的時候，亦可以有生命力、成長，「自然會有另一朵花」。

童年居石蔭邨 指是房委會成果受惠者

房委會今年成立50周年，羅淑佩自言是成果受惠者，3歲從觀塘裕民坊唐樓，搬入當時新落成的葵涌石蔭邨，自言度過了開心的童年。在大學畢業後， 羅淑佩搬出去自住，父母則因石蔭邨清拆而搬到安蔭邨。

後來母親離世，羅淑佩就對父親說：「不如我哋交返間屋出嚟啦，俾下一個家庭啦，然後我幫你買過間屋啦。」她認為公屋並非「一出世住到老、住到百年歸老」，而是提供流轉及向上流動的機會。

現場公屋平均輪候時間為5.8年，當局提出在2027年平均輪候時間減至4.5年，羅淑佩強調，當局已很努力造地、搵地，在有地的時候提速、提效、提量及提質，「宜家提埋安全，盡快咁去起樓」。

公屋等如「人生勝利組」？ 鼓勵年輕人向上流動

對於有說公屋出現「世襲制」，羅淑佩澄清並舉例指，當本身是父親戶主過身後，便會轉名給母親，當局鼓勵兒女在長大後繼續與父母居住，達致長幼共融、居家安老，但當母親過身後，則要視乎子女的入息是否符合申請公屋的資產及入息限制：「所以無話存在世襲呢樣嘢。」

至於獲派公屋被視為「人生勝利組」的說法，羅淑佩就表示：「我哋都唔係話大家不斷要喺公屋度，我今日個重點都係，唔係話由出世就住到百年歸老嘅地方。」她表示，當局鼓勵有能力的市民置業向上流動，所以部門近年認真打擊濫用公屋。

不希望為上公屋「減人工躺平」 羅淑佩：做業主都係人生成就

羅淑佩提到，曾聽過年輕人為了入住公屋，便「減人工躺平」：「我希望大家唔好有一種錯覺，越後生開始排，排吓排吓就到㗎啦。其實就真係唔係好容易到，因為我哋都覺得，點可能一生人都淨係喺公屋嗰個資助限額、入息限額同資產限額下面呢？我哋都希望大家可以努力工作啦，搵到多啲錢啦，可以喺個階梯爬長去，做業主都係一個人生嘅成就嚟嘅！」

此外，羅淑佩續談到自身經歷，自言在大學畢業後發奮，希望有一日能置業：「又可以搬我爸爸媽媽，嗰個就勝利組啦！」她近日參觀大學宿舍，稱感到十分羨慕，明白年輕人希望有自己的生活空間：「如果我有間咁嘅宿舍就好啦，不過讀完之後要返去同阿爸阿媽住⋯⋯唔係講個屋企環境唔好，不過要管住我。」

澄清新移民非較快上樓 部門如掌握線報將抽查跟進

對於新移民較快獲編「上樓」的說法，羅淑佩先指出，居港未滿七年人士沒有資格住住公屋，但指循正途來港的人亦有住屋需要：「所以我哋都可以話住滿咗七年，你再去排咁樣，呢啲都係我哋香港嘅居民嚟，你俾得佢哋入嚟佢都係。」

羅淑佩指出，部分人士本身已有在港的親人為公屋居民，例如父母、配偶便有機會入住公屋：「如果呢個所謂household 呢一戶，佢嘅全部嘅人口裡面，超過一半都係新移民呢，都係唔得嘅，嗰啲新移民都唔可以住入嚟。」不過，羅淑佩強調部門會抽查新移民的內地資產，確保未入住公屋前已要符合資產及入息要求，如掌握線報涉及虛假資料，便必定會跟進，但就不會「穿橋」。