美斯抵日笑面迎人 日本第一牛郎Roland興奮大曬合照 網民：都好落香港面

「Tatler XFest Hong Kong: 香港隊vs國際邁亞密」友誼賽喺日前（4日）結束，「球王」美斯（Lionel Messi）缺陣令大批現場球迷大感失望，噓爆兼大叫回水。美斯其後跟隨國際邁亞密飛抵日本東京，準備今晚對「神戶勝利船」嘅表演賽，美斯到達日本後被捕捉到佢笑面迎人，同佢喺香港黑口黑面嘅反應相差甚遠。另外，美斯除咗單獨出席記者會及參與球隊操練之外，夜晚佢仲參與歡迎晚會。被譽為「日本帝王級牛郎」嘅Roland羅蘭原來都有同美斯見面，二人唔單止合照，羅蘭仲獲得美斯親筆簽名嘅足球鞋。

Roland羅蘭喺IG大曬與美斯嘅合照，及美斯親筆簽名嘅足球鞋，並以日文撰文多謝美斯訪問日本：「感謝您呢次嚟日本，並冇因為我職業背景而對我有偏見，以友善嘅方式對待我，感謝你抽空時間。多謝你跟我講，無論係從事咩行業，能夠成為一個行業嘅大師都係極具意義。」

唔少網民睇到Roland同美斯嘅合照後，紛紛留言表示不滿美斯嘅做法，例如「香港見不到的messi」、「喺我地嗰度都冇笑得咁開心」、「都好落香港面」、「球王吾（唔）喜歡Hong Kong」、「咁唔鐘意香港，以後都唔好再來啦⋯⋯」、「喺香港就愁眉苦臉 去到日本即刻乜事都無」及「睇唔起香港」等等。不過亦有網民留言表示支持美斯，例如「我去到日本都心情好」、「一個地方 令佢覺得安全放心 自然就輕鬆同享受架啦」、「美斯同好多香港人一樣，去日本就開心」、「我有理由相信係香港嘅安排岀現問題。。。。先搞到佢咁」、「同牛郎影相，都唔同香港邊個邊個影」及「越來越鍾意美斯」等等。

表演賽喺今晚進行，想知美斯會唔會出場，或者踢幾多分鐘，大家拭目以待喇！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！