美麗戰場｜李成昌飾江湖人物威爺 現實中係好老公好爸爸 仲曾捐骨髓救患癌家姐

TVB台慶劇《美麗戰場》正在熱播中，搵嚟陳瀅、陳山聰、朱晨麗、劉佩玥、蔣家旻、方力申及陳曉華等人主演，劇情主要圍繞幾位女角色之間為復仇而明爭暗鬥。而喺劇中飾演江湖人物威爺嘅李成昌同樣亦非常搶鏡，為劇集加咗唔少分。

李成昌喺《美麗戰場》中飾演江湖人物威爺，威嚴又心狠手辣，懾人嘅氣勢令好多人都怕咗佢，睇到觀眾心都寒一寒。最新劇情就講到鍾家寶（陳瀅飾）及異父異母衰細妹鍾家琪（蔣家旻飾）齊齊入圍2006年香港小姐，威爺為咗幫助「契女」鍾家琪而收買電視台監製Cat姐（樊奕敏飾），另外佢仲覬覦鍾家寶。

現年65歲嘅李成昌入行43年，過往參演過嘅劇集多不勝數，經常喺劇集飾演配角，相信大家最記得嘅一定係佢經常飾演惡人及江湖人物。但現實中嘅李成昌同奸角角色完全相反，佢係一個好老公同好爸爸，家庭為重嘅佢喺每日放工後，最期待就係返屋企，而且佢仲為咗太太拒絕北上工作，仲曾經捐骨髓救患癌嘅家姐。

李成昌與太太喺93年結婚，婚後生咗一個女Meganie，一家三口生活美滿。佢個女係哈利波特迷，所以一直嚮往英國校園生活，兩公婆為咗成全個女嘅夢想，就用積蓄送佢去英國讀書，仲話寧願自己辛苦啲，努力工作供佢出去讀書，都唔想將來後悔。

至於李成昌同太太二人結婚29年，感情依然好好，佢好感恩太太一直都好支持佢，佢哋多年嚟冇鬧過交。而佢亦因為掛念太太而拒絕北上工作。佢認為二人相處就係互相忍讓，嘗試接納及用對方嘅方法做事，有咩要講出口，唔好放喺心入面，咁樣先可以維持到老。

另外，李成昌嘅家姐曾經患上淋巴癌，而佢為咗救家姐捐骨髓，不過可惜家姐不敵病魔，最終離開人世。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！