翁靜晶回應何太質疑「律師牌買返嚟」言論 分析「一晚五次論」同香港法例有關

曾經係藝人嘅律師翁靜晶，上個月喺個人youtube頻道「危險人物2.0」直播討論何伯何太事件。而近日何太喺社交平台群組上，討論追返何伯被細女提取嘅450萬元昤，有網民提到「翁靜晶律師講好難喔何太」，何太當堂好激動咁同呢位網友講「你再提呢個律師嘅名呢，我證明你同佢係一派」。何太之後又留言話「我就懷疑緊佢個律師牌點樣買嚟」。

尋晚翁靜晶喺「危險人物2.0」再開直播，提到「買律師牌」言論，笑謂「邊度有得買呀，我想買多個喎！」，又指「其實講呢一樣嘢嘅人都幾傻」。翁指自己12歲入行至今，唔少觀眾都睇住佢做過乜，又提到有人「唔係咁得人鍾意嘅，你仲要又話房屋署長又點樣……去講人地。咁你覺得你咁做法，鍾意你嘅人會多咗定唔鍾意你嘅人會多咗呢」。

之後翁靜晶講咗自己讀法律嘅經歷同分享法律知識，再將話題一轉，由何太指罵個別律師係「廢柴」，跳到「一晚五次」呢點。「一晚去起身五次屙尿？一晚五次呢樣嘢，咁點解要咁樣講呢？」，翁靜晶提到香港法例嘅婚姻條例中，有一條提到一男一女婚後如果無行房，婚姻可以被判無效。「一定要發生咗性行為，完成咗個性行為，你個婚姻先叫有效。咁所以點解咁緊要要講，唔係一次呀，係五次呀、五十次呀，原來原因就係有人好識得法律嘅」。

翁靜晶續指，即使婚前有性行為，但婚後任何一方因任何問題而未能圓房，呢段婚姻都可以被宣判無效。而如果夫妻其中一方唔願意發生性行為，另一方都可以提出離婚。翁靜晶提出點解有人強調圓房與否，認為「有人可能就係驚住一陣間，老人家原來根本都冇能力嘅，咁點呢？咁咪即係無效？咁咪好大件事囉，證明即係有人都好熟知法律。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！