【聖誕2023】聚餐好介紹 超豐富聖誕節自助晚餐精選

好快又到聖誕節啦，當然要趁機會好好慰勞一下辛苦咗一年嘅自己，盡情豪食啦！今年每間酒店都推出各式各樣嘅自助餐，睇吓邊間啱心水啦。

份量十足戰斧扒 咖啡廳

主打豐富嘅環球美食，節慶自助餐有充滿節日氣氛嘅香烤原隻火雞、原條威靈頓牛柳、份量十足嘅戰斧扒等。原隻火雞香脆滑嫩，戰斧扒熟成程度啱啱好又充滿牛味。冰鎮海鮮包括即開時令生蠔、波士頓龍蝦、麵包蟹、鱈場蟹腳及其他即切刺身，熱食有如香煎鴨肝及足料窩心燉湯，好有誠意。甜品包括黑森林蛋糕、聖誕樹頭蛋糕、聖誕老人慕絲蛋糕及迷你聖誕樹抹茶朱古力撻等，好應節呀。

包羅萬有人氣自助晚餐 JW咖啡室

如果你係海鮮控嘅話，呢間聖誕自助餐就啱晒你！供應時令海鮮如新鮮龍蝦、雪蟹腳及麵包蟹等，日式刺身同手握壽司區亮點有 5 至 6 頭南非鮑魚、帶子同三文魚籽。熱葷仲有蠔皇扣 5 至 6 頭南非鮑魚及花膠、燜海參扣柚皮、芝士焗虎蝦、焗帶子伴荷蘭醬及上湯龍蝦伊麵等，一定飽到捧住個肚走。

聖誕歐洲小村莊主題自助餐 Promenade西餐廳

呢個自助餐就以聖誕歐洲小村莊為主題，重點推介海膽醬燒龍蝦，嚴選肉質結實嘅大龍蝦，伴隨滿滿海膽香氣，鮮甜濃郁。另有火炙原條鹽焗三文魚，於客人面前即席淋上醇酒再點火燒烤，鮮味又充滿油香。其他特色食物仲有多款海鮮、香草燒鹿架伴熱情果醬、芬蘭燴羊仔肉及燒豬肉免治煙肉卷。甜品如聖誕紅絲絨忌廉海綿蛋糕、聖誕薑餅屋都好啱打卡！

特色聖誕自助晚餐 Yamm

想過一個特別嘅聖誕？呢間供應包括燒火雞配燴栗子、黑松露伊比利火腿、冰鎮海鮮、香烤威靈頓牛柳、京式片皮鴨等等～以及多款由糕餅團隊匠心巧製，美輪美奐嘅節日甜品。最特別係聖誕老人將於平安夜及聖誕節到訪、與眾同樂，亦會有魔術表演及小丑扭汽球活動，啱晒帶埋小朋友去享受聖誕家庭樂呀！

與眾同樂聖誕自助晚餐 PLAYT 咖啡廳

琳瑯滿目嘅美食中，亮點當然係烤聖誕火雞配各種配料，包括雞肝肉汁、椰菜仔、燴紅椰菜、焦糖栗子、傳統麵包釀餡、豬肉腸煙肉卷同小紅莓醬。芝士控就一定會鍾意傳統熱溶瑞士拉可雷特芝士配烚迷你薯仔及配料，超香濃芝士味。節日甜點包括瑞士瑞克雷乳酪雪糕、黑松露白朱古力慕絲、聖誕木頭蛋糕、傳統聖誕布甸、法式燉蛋及芝士慕絲及焗薑餅流心芝士撻。

文: Yanica