聲夢傳奇2｜任暟晴連續7星期人氣榜第一 唱《歡樂今宵》有感情揮低黃洛妍

TVB歌唱選秀節目《聲夢傳奇2》如同上屆一樣，「男子組」嘅討論熱度未如「女子組」般熱烈，唔少女參賽者已經率先跑出，當中包括只有16歲嘅「Chantel 2.0」Jasmine任暟晴被網民封為「黑馬」，佢已經連續7星期喺《聲夢傳奇2》人氣榜佔據首位。佢喺最新一集演唱古巨基原唱嘅《歡樂今宵》，以16:9成功揮低黃洛妍Janees演唱黎明嘅《情深說話未曾講》。

喺第九集嘅新一輪賽制，紅藍兩隊以演唱會模式對戰，喺紅隊各人討論「年度之歌」環節唱咩歌時，隊友們都提出不同嘅意見，不過任暟晴竟然突然提議並唱出大家樂廣告歌，現場即時氣氛尷尬至極，隊友們只好落力配合，不過有啲學員面部依然露出尷尬嘅表情。

最後，任暟晴決定以《歡樂今宵》出戰，導師Gin Lee見佢壓力爆煲，就安慰及送心意卡畀佢。另外，Gin Lee覺得佢唱《歡樂今宵》唔夠感情，於是就同Jasmine傾咗一個鐘頭電話分享自己嘅愛情經歷，令Jasmine更容易投入歌曲嘅意境。最終Jasmine喺演出時唱得非常有感情，得到評判支持，以16:9贏咗Janees。

現年16歲嘅任暟晴，除咗樣子甜美之外，佢音樂根底真係一啲都唔輸蝕，喺3、4歲時已經開始學唱歌，更先後擁有ABRSM歌唱8級及ABRSM鋼琴8級。熱愛音樂嘅佢仲參加過唔少學界或校內歌唱比賽，就連學校嘅IG都有PO佢張相。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！