自稱「劉馬車爸爸」IG代出PO指囝囝於警局廁所輕生 ： 補賽後徹底退出幕前

網絡紅人劉馬車（劉駿軒）一向言行出位，上月原本參加培生擂台與龍心展開對決，不過喺出席完賽前過磅記招後，因涉嫌「非禮」被警方帶走，無法如期出席賽事。

至今都未有現身嘅劉馬車，日前突然喺IG發聲明，聲稱係「劉馬車爸爸」出PO：「馬車爸爸公開聲明一則：大家好，我係劉馬車嘅爸爸。車仔前幾晚喺差館臭格自殺，經過搶救之後，情況暫時穩定落黎，車仔而家正喺某個地方靜心修煉緊，所以黎緊呢段時間車仔嘅所有社交平台都會由我代為管理。希望大家俾多d正面嘅鼓勵車仔，等佢可以慢慢成長、重新出發。車仔想同鍾生講聲對唔住，更加想同每一位買咗飛入場支持自己嘅觀眾朋友衷心道歉。由於長期飽受嚴重嘅網絡欺凌同埋外界各方面嘅騷擾、攻擊，車仔承受住巨大嘅精神壓力，十分之痛苦，所以車仔決定打完培生擂台嘅補賽之後就會徹底退出幕前、退隱江湖，做番一個普通嘅平常人，過番d安寧嘅日子。為人父母天下之善，作為父親，孩子平安喜樂，就係最大嘅欣慰。」

之後，「劉馬車爸爸」再喺IG發第二則聲明，表示衷心感謝鍾培生嘅關心及鼓勵，令到囝囝重新振作及承諾會好好活著，及囝囝將來會喺音樂上面發展：「馬車爸爸公開聲明第二則：大家好，我係劉馬車嘅爸爸。好想衷心感謝鍾培生先生呢段時間咁關心我個仔，鍾生正面嘅鼓勵，令到自殺未遂嘅車仔決定要重新振作、振翅高飛。車仔話一定會履行承諾，好好活著，用自己嘅一生好好去報答鍾生嘅知遇之恩，鍾生放心，馬車一定會喺《培生擂台》嘅補賽全力以赴，打低霍哥。除咗準備拳賽之外，黎緊車仔仲會專注喺音樂上面發展，用音樂感染生命、將愛同正能量傳遞出去，香港呢個社會真係好負面，香港人充滿負能量，成日都鍾意食花生，想睇人點死！唉，其實車仔拍咗12年片了，初心一直無變，就係想帶多d歡樂俾大家。哪怕受盡外界攻擊、傷害，依然🎤從沒有放棄過心中的理想🎤，所以希望各位香港人一齊俾多d正面嘅鼓勵同埋全力去支持車仔，多謝大家！」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！