艷福無邊 蔡潔險走光 陳展鵬親熱尷尬 鼻涕吊吊揈

蔡潔讚陳展鵬好戲,合作獲益良多。
蔡潔讚陳展鵬好戲,合作獲益良多。

視帝陳展鵬於新劇周旋於蔡潔及吳若希之間,不乏香艷場面,相當火辣﹗艷福不淺的展鵬笑言有苦自知,拍親熱戲時不停流鼻水,又擔心拍檔蔡潔會走光。

陳展鵬、蔡潔及戴祖儀等前晚出席劇集《香港人在北京》煞科宴,席間預告片率先曝光,展鵬先與「前女友」蔡潔有親熱戲,之後被「太太」吳若希用長腿挑逗,洪永城則與傅嘉莉激吻,「串星」梁漢文、麥長青及盧慶輝等紛紛現身,卡士吸引!

談到展鵬與蔡潔拍親熱戲,男方要先孭起性感打扮的蔡潔,當被讚手瓜起𦟌時,他笑言:「訓練咗幾年,日日抱住三十幾磅(囡囡)喎!拍得尷尬,鼻敏感不停流鼻水,又好驚佢走光。」提到吳若希長腿誘惑,他表示:「因為要就鏡頭擺位,只係表達到1/10嘅美感咋。」

蔡潔再三否認戀情

對於蔡潔拍攝期間獲何浩文北上探班,因而傳緋聞,她再三澄清:「緋聞係工作一部分,佢上嚟搵吳業坤咋,我哋有一齊出去玩,但只係朋友。(唔係你杯茶?)唔係。(有冇發展機會?)冇。」展鵬起初表示未見過何浩文出現,後來經蔡潔提醒才說:「我邊知啫!每次出去玩要照顧老婆同囡囡,搞唔清邊個打邊個。吳業坤唔好趁老婆唔喺身邊,搞啲咁嘅嘢啦!」

而戴祖儀透露先後到寧波、北京及廣州拍外景,會趁空檔四出觀光:「返到香港最唔習慣係要拎銀包,喺內地一部電話已經搞掂晒。內地真係好多美食,搞到我肥咗3kg返嚟。」由於拍攝期正值炎夏,她坦言曬黑不少:「我本身有馬來西亞血統,一曬即黑,反而吳若希點曬都唔黑,皮膚真係好好。」

至於身為女主角的吳若希缺席煞科宴,其實早前她試過臨時甩底,未有如期參與慈善演出,要由連詩雅頂替,有指她確診新冠肺炎,記者嘗試聯絡求證,但未獲回覆。

戴祖儀於內地狂歎美食,返港後要努力減磅。
戴祖儀於內地狂歎美食,返港後要努力減磅。
眾星早前北上拍劇,趁空檔四出觀光。
眾星早前北上拍劇,趁空檔四出觀光。