芷珊約你︳楊千嬅重提2019年表態風波 曾經驚喺街俾人鬧 嬲歌迷打碎CD

TVB訪談節目《芷珊約你》最新一集由黎芷珊遠赴上海追蹤喺當地開演唱會嘅楊千嬅，芷珊亦都同千嬅進行深入訪談，向來大情大性嘅千嬅繼續喺訪問中流淚，連黎芷珊都受感染不時眼濕濕。

節目焦點可以話係千嬅重提2019年「表態事件」後嘅心路歷程，千嬅以「網絡風暴」形容該事件，話好多人想知佢呢幾年點過。當時香港正值社會風波，千嬅老公兼經理人丁子高嘅公司喺微博發聲明指「堅持香港特別行政區是中華人民共和國不可分割的一部分」、「楊千嬅女士一直深愛中國，深愛香港，敬請各大平台及用戶停止傳播有關對楊千嬅女士的不實言論」，而千嬅亦喺個人微博轉發聲明並寫道「我在香港出生及長大，我愛這遍（片）土地，也熱愛我的祖國。我相信明天會更好」。事後唔少歌迷感到不滿，甚至有人post出將千嬅CD打碎嘅相片。

千嬅喺《芷珊約你》中憶述，當時正準備喺內地舉行巡迴演唱會，本來為有望一圓入行廿幾年嘅夢想而高興。「突然間『嘭』一聲跌落嚟。嗰時呢個反差太大，我消化唔到。我好叻處理呢啲事，突然間我唔識呀，因為我lost咗成個人。每日好驚好慌，嗰種慌係嚟自突然人生感到迷失。唔知道應該講乜，但係我唯一理性地知道，我要熄機，靜返落嚟先」。

千嬅又形容當時嘅過程痛苦，但之後疫情出現所有工作停頓先令佢更痛苦，因為不停否定自己。千嬅話當時擔心出街會有事，「有人衝埋嚟鬧我咁點呢？唔知會唔會」。同時千嬅冇同朋友見面，「同朋友出去食飯，我同佢講咩呢？唔好啦，唔知又會講啲咩」。深閨嘅千嬅話嗰時不停煮飯，好專注咁做一件事嚟療傷。後來老公發現千嬅將對音樂嘅苛刻返喺煮餸之上，但千嬅都係一副「我冇嘢呀」嘅樣。

之後千嬅睇到歌迷打碎佢嘅 CD張相而感到「好嬲」，「你唔鍾意我個人，你否定我，但唔應該否定我嘅作品，因為呢啲係我嘅音樂尊嚴，唔係淨係我一個人嘅嘢嚟」。千嬅話「我好喜歡自己嘅夢想，我亦都覺得自己嘅選擇冇錯」，然後提到2022年底喺香港舉行演唱會係佢嘅決定，但過程諸多阻滯，直言合作單位可能驚咗佢。最終香港個唱順行完成令千嬅鬆一口氣，佢喺節目亦借此分享面對社交媒體聲音嘅體會。「唔好俾網絡嘅說話帶走自己，要對自己有信心，自己嘅成就、生活、我地嘅生存、能力係自己決定同控制，唔係別人……你都唔知喺邊度搵山嚟嘅不負責任評論去控制我嘅人生。我唯一可以做嘅係調節自己，改變自己」，同時千嬅話要內心好強大先可以正面面對「我係唔紅」呢句說話。

千嬅喺內地巡迴演出嘅歌單有唔少廣東歌，節目中千嬅話「好 proud of 自己係廣東歌歌手」，而且希望喺體力許可下將廣東歌帶到唔同地方演出。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！