芷珊約您｜張敬軒大談低潮期 自爆曾於酒吧唱歌遭不禮貌對待：一籃花生殼飛埋嚟

TVB全新紀錄式訪談節目《芷珊約您》於逢星期日晚上9時半播映，主持黎芷珊碌盡人情牌誠邀樂壇舉足輕重嘅人物作嘉賓，包括溫拿、張敬軒、楊千嬅、王嘉爾、草蜢、許志安及陳慧琳。昨晚（28日）播出第二集，芷珊帶大家一齊到紐約去支持張敬軒。

芷珊於張敬軒演唱會開騷前一日到張敬軒下榻嘅酒店突擊檢查，當時張敬軒穿着浴袍正在熨衣服，非常搞笑；除咗檢查張敬軒嘅行李，張敬軒亦公開強逼症執篋大法，親自示範點樣將所有物品啱啱好塞滿整個篋，一啲空位都無。芷珊又安排咗一輛 Limo（豪華轎車）與張敬軒去喜雀兒市場閒逛和食嘢，二人於車內一邊歎香檳一邊傾偈。入行廿年嘅張敬軒坦言曾有過經濟困難嘅一刻，亦指因為搵錢搵得快而做歌手：「十個煲六個蓋囉，特別2004年開始，屋企係有困難，嗰刻係開始覺得我嘅生活同命運已經唔喺自己手上。」張敬軒直認曾為賺錢做過一啲自己唔鍾意嘅事，年輕時曾因等錢使，以十萬人仔賣斷收錄咗《斷點》嘅專輯版權，感嘆表示：「當年《斷點》據我所知（依家）係過億版稅。」張敬軒又向芷珊提到自己未紅時曾流連酒吧唱歌賺錢，當時遭唔少客人不禮貌對待：「唔需要有原因㗎，一籃花生殼就飛埋嚟！」，亦指雖然有點Hurt，不過而家睇返好感恩，但張敬軒當時問咗自己兩條問題後就決定放下情緒，積極處理面對，因而磨練出圓滑性格。

芷珊與張敬軒去到喜雀兒市場大歎海鮮餐，芷珊問及張敬軒如何勉勵後輩，張敬軒即笑指自己唔想做「老海鮮」，覺得要有自信：「要保持平和嘅競爭心態，先可以行得更遠。 同埋最緊要係要有自信，其實你係有地位嘅，就算企好遠都好，人哋都會框番你出嚟。」及後，芷珊又以第一身視角帶大家感受張敬軒演唱會後台氛圍，張敬軒綵排期間對演唱會細節一絲不苟，認為每個環節都唔可以放過：「唔可以Hea做，因為你唔會知自己嗰一晚、嗰一首歌對觀眾係有幾咁大嘅意義，所以每個環節都唔可以放過，呢樣係我爸爸教，教我要按章、按時、按量去做好演出。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！