荷里活廣場命案︳抽水出事 保險公司發聲明解僱 林作證實被炒

荷里活廣場星期五發生全城轟動嘅命案，一名男子喺商場內用刀襲擊2名女子，2名傷者終傷重不治。以「香港抽水王」自居嘅林作，命案發生後喺社交平台post出一張模仿疑犯造型照片，仲話「放售疑犯同款波鞋」、「逃跑一流」，被唔少網民鬧爆，之後林作就刪post了事。

林作任職嘅保險公司今日發聲明，表示「知悉有個別理財顧問於社交平台就近日的社會悲劇作出不當言論及行為，這與我們公司的價值觀背道而馳。」，並決定「與有關理財顧問終止合約」。

網路亦流傳一張截圖，指林作舊愛麥明詩有like到保險公司嘅聲明。

而林作亦向傳媒證實，承認保險公司高層同佢聯絡，提出解約。林作話對方冇講原因，佢就估係因為有網民攻擊保險公司，因此喺壓力下要將佢解僱。林作補充話唔係即時被解僱，但公司會喺短期內正式「派大信封」。

林作尋日喺刪post後再發聲明﹐表示「堅決不為我的言論道歉，並自豪重申：作爺從來不道歉，才能走到今日」，又認為出嗰個「抽水post」嘅用意係「希望大眾不要脆弱到被昨晚的事搞到不安。串啲講句，小題大作」、「言論自由是我的，我只是想做我的玩笑，令大家可以跳出來看看這件事，不要過度放大」。

33歲嘅林作本身係大律師，但正式執業唔夠2年就申請放棄大律師資格。2020年轉行加入保險公司，聲稱2個月簽下30張保單，被解僱前做到資深區域經理，並自稱屬下團隊帶領80人。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！