華豐大火｜地盤工闖火場 救人救小狗 重遇被救老伯感安心 「消防先係大英雄」

油麻地華豐大廈昨日（10 日）的三級火，奪去五條人命，消防員、民安隊在大廈前方救火救人，大廈後面的一個建築地盤，一班無名英雄救出十多條人命。幾位地盤工人協力用長梯、吊籠，救出十多名災民。

燒焊工人文先生，一度冒著濃煙走入大廈賓館，救出被困的老伯、婦女和年青人，「消防員喺前面，我哋喺後面，冇消防員嘅時候，我哋盡力幫手。」文先生坦言，今天看新聞時感難過：「我哋以為救咗好多人冇乜問題。有啲唔開心，冇諗過咁多傷者，有人已經走咗。」

華豐大廈的後方有一個地盤，昨天上午，地盤工人準備施工，發現大廈冒出濃煙。七至八位工友，最初在旁觀察，突然有人向地盤方向呼救，工友們隨即動用長梯救人。「一齊幫，上面幾個，下面幾個扶梯，扶佢哋落嚟，叻㗎（索具工）、電機都有，我就燒焊」。

冒濃煙走入賓館救人

文先生入行數年，一個多月前才轉到事發地盤，遇上火災。他說，事發時沒作太多思考，便決定救援，「大家見到咁危險，第一個行動，一定衝埋去救佢哋。」

文先生更一度闖入火場。他從大廈後方的平台，走入賓館救人。他沒有拿毛巾掩口鼻，只是蹲下來慢慢走，「好勁呀啲煙，跑入去吸咗兩啖，喉嚨已經唔舒服。冇晒燈，地下全部都係水，見到伯伯自己一個。」
他說，消防員和民安隊在大廈前方灌救，但有人走到大廈後方呼救，因此他打算進入賓館看兩眼，看有沒有人被困，結果看見老伯、婦女和帶著小狗的年輕人被困，「佢哋企喺度唔敢走，我話慢慢行樓梯落去就無事。」今晨，他在現場重遇昨日被困的老伯，因而感到安心。

大半小時，他們救出十多人。「消防員嚟緊。因為消防員喺前面，我哋喺後面。冇消防員嘅時候，我哋盡力幫手。」

「消防員先係大英雄」

奮力營救市民而備受讚頌，文先生卻說：「消防員先係大英雄，我哋呢啲小市民嚟啫，冇得同佢哋比。」

事隔一日，文先生仍有餘悸，坦言看見新聞後感難過，救出多人，但原來仍有多人死傷。「有啲唔開心，好多傷者，冇諗過咁多。諗住得幾個人受傷，但有人已經走咗，40幾人受傷。我哋以為撲熄啲火就冇乜問題，點知咁大單……」他坦言，如下次再遇同類險境，仍會盡量幫忙，但若太危險則不會嘗試，免加重消防員工作。