《萬千星輝賀台慶》狂吸負評 網民：唔知以為阿姐生日

一年一度嘅無綫盛事《萬千星輝賀台慶》喺噚晚已經圓滿結束，超過200位藝員盛裝出席。全台藝員更傾力演出慶祝公司53周年，除咗有唔少歌舞表演之外，節目亦安排咗唔少遊戲環節，不過一班網民就覺得節目嘅環節麻麻地，以下就同大家睇下網民有咩不滿啦！

唱歌環節似足馬騮戲
節目安排咗唔少唱歌環節，當中包括譚嘉儀同谷婭溦追單車唱歌、連詩雅等人圍圈追咪唱歌、周柏豪同胡鴻鈞做住引體上升唱歌等等，唔少網民都話好古怪同冇誠意等等：「玩緊啲觀眾定係玩緊啲歌手呀」、「睇咗陣，尷X到後腦涼浸浸」、「幾無聊」、「正正經經唱歌咪幾好 而家好似馬騮戲」、「個咪輪流唱咁唔衛生」、「正經唱歌仲好，而家唱到古古怪怪」及「冇誠意，抄王菲憶蓮以前環節」等等。

表演環節欠氣氛
今年台慶有唔少藝員落力演出，但有部份環節被指好無聊同悶，例如《開心速遞》藝員表演拍手舞、估邊位演員係真盲俠、估邊男藝員隻手唔係佢自己及藝員表演踢板等等。唔少網民睇完都紛紛留言：「拍手都可以拎嚟表演？」、「遊戲節目咩」、「拍手舞做一段就Ok，拍咁耐就好悶」、「唔知以為阿姐生日，悶到呢」、「踢板完全流到爆」及「完全冇氣氛」等等。

楊千嬅做壓軸嘉賓
今年台慶請咗楊千嬅做壓軸表演嘉賓，佢先後獻唱咗經典歌曲《少女的祈禱》、《飛女正傳》及《假如讓我說下去》，不過佢就被指唱歌走音及唱慘情歌唔吉利，例如：「唱成咁重夠膽開演唱會，嚇死人咩」、「走晒音」、「TVB生日唱埋d慘情歌，大吉利是」、「林夕同陳輝陽嘔血未」、「千嬅唱得差左」及「義氣腔好難頂」等等。