萬千星輝賀台慶2023｜司儀陣容雲集18名多代藝員 網民不解新生代名單：請問賣點係咩

《萬千星輝賀台慶》將會於本周日晚上8時15分播出，舞台設計及演出項目均圍繞「初心」主題，9大表演項目將由資深藝人帶領新生代藝員共同演出，司儀陣容除咗雲集多代資歷豐富嘅藝員，更有別於過往，將加入中堅級及新生代藝員，共18人，陣容鼎盛！

台慶2023大會司儀由汪明荃（Liza姐）領軍，包括司儀界「老手」鄧梓峰、陳百祥（叻哥）、阮兆祥、陳貝兒、黎芷珊；中堅級麥美恩、吳幸美、馮盈盈、陸浩明、Patrick Sir（林溥來）及去年於TVB台慶頒獎禮上單拖任司儀被激讚嘅周奕瑋。至於，新人級就有備受力捧嘅何沛珈、《聲夢傳奇》系列潘靜文和彭家賢、J2er主持吳兆麟、「獎老」林正峰以及應屆港姐冠軍莊子璇。一班新生代藝員首次成為大騷司儀，連佢哋都忍唔住直認緊張，表示要將自己嘅稿背好之餘，更要訓練自己成為「氣氛擔當」，莊子璇就坦言有私下向師姐馮盈盈取經。一班司儀前輩就認為今年台慶司儀組合非常熱鬧，一班人圍埋一齊開心之餘更可以分擔司儀工作；Liza姐及叻哥更指可以拉低年齡，而鄧梓峰就笑言擔心中大獎機會會變細。

不過，網民對於呢個台慶司儀陣容似乎有意見，紛紛討論當中嘅人選，認為多人唔一定好睇：「今年又無Do姐，唔好睇囉….好似上年咁…某幾個司儀搭晒咀…都聽唔到講咩野，多司儀唔代表好事～」、「好有亞視feel」、「TVB越來越似似後期ATV」、「5-6個司儀夠了，但太人會亂」、「阿叻又話退休」等等。亦有網民提及過往做開司儀嘅森美、鄭裕玲（Do姐）及宋宛穎點解無咗影，其他網民回覆指無咗森美同Do姐反而更好，可以比其他人多啲機會；至於宋宛穎，網民就認為佢唔係紅，搵莊子璇頂替佢都好合理，更表示台慶需要執生，覺得宋宛穎做主持麻麻地。司儀名單中最多人質疑何沛珈及林正峰，直言唔知點解TVB要捧佢哋：「何沛珈懶音又多」、「點解又有林正峰」、「佢一出場，只會對焦佢（林正峰）對眼」、「嗰個阿峰請問賣點係咩？」、「捧得好勁（林正峰），不過好在18個、正式做司儀無幾多part」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！