萬千星輝賀台慶2023｜表演環節被網民嫌冇主題兼炒冷飯 尹光唱太少淪陪襯

一年一度嘅TVB盛事《萬千星輝賀台慶》喺噚晚（19號）圓滿舉行，今年除咗有全台藝員施展渾身解數落力去表演各項環節之外，仲有陳慧嫻及尹光等擔任表演嘉賓。曾幾何時《萬千星輝賀台慶》係香港人必睇嘅重量級大型節目，想知網民對今年嘅台慶環節有咩感受？快啲轆落去睇啦！

司儀陣容過多 年輕司儀表現有待改善
今年嘅《萬千星輝賀台慶》舞台設計及演出項目均圍繞「初心」主題，司儀陣容除咗雲集多代資歷豐富藝員之外，更加入中堅級及新生代藝員，一共18人（汪明荃（Liza姐）、鄧梓峰、陳百祥（叻哥）、阮兆祥、陳貝兒、黎芷珊、麥美恩、吳幸美、馮盈盈、陸浩明、Patrick Sir（林溥來）、周奕瑋、何沛珈、潘靜文、彭家賢、吳兆麟、林正峰及莊子璇，，陣容鼎盛！節目播出後，網民就認為司儀過多及年輕司儀表現麻麻，留言話：「18個主持 不如下年成個台都係主持」、「主持過多 切合主題 「亂」」、「港姐冠軍，真心唔得，又唔講野」、「D後生主持講嘢都講唔正」、「司儀一定要努力讀一句嘢都唔掂」、「啲主持由阿姐dodo變到宜家呢班真係好無語」、「全晚最痴線兩件事，第一Sherman係咁搶啲嘉賓公布結果，極不尊重，第二就係頭先6號叫陳豪放棄嗰幾十萬」、「今晚啲mc係咁互搶對白」、「港大學生係咁食螺絲」及「下年全個台都係司儀」等等。

表演環節冇主題又炒冷飯 生日都要賣慘？
每年台慶都有唔少表演環節，而今年嘅台慶當然都唔會例外啦！噚晚有多個載歌載舞、魔術及藝人道盡演藝圈辛酸嘅環節，雖然成晚嘅表演冇停過，不過網民就認為環節冇主題、又炒冷飯，仲要喺生日嘅日子賣慘，覺得睇到好尷尬話：「女就跳姣舞 男就打功夫 年年都咁」、「感覺今年的最悶，唱歌的部份太多，好像在看音樂會」、「Out到央視都唔做依d啦」、「D表演點解可以完全冇主題 就咁叫下人郁下算 d公園呀姐咁」、「冇主題 咩野都mix埋一齊」、「東張都係去做返街訪啦」、「我寧願成晚做台慶趣劇」、「又翻炒？上年又係新人賣慘」、「年年台慶都有賣慘」、「上次又賣慘 台慶開開心心」、「點解年年生日都有賣慘環節」、「生日點解要講扮死屍 又講死老豆」等等。另外，亦有網民不滿《中年好聲音》嘅參加者喺台慶表演「老是常出現」，留言：「中年 high school musical?」、「中年好聲音夠未」、「班中年好聲音好紅？ 唱咁多首」及「快啲完啦 無人想睇班中坑跳80年代 返去荔園啦」等等。

尹光登場網民勁期待 光b唱得太少淪為陪襯
喺噚晚，尹光與《中年好聲音》第一季和第二季參加者演出「大笪地好聲音」環節，喺台慶播出前唔少網民已經表示期待，不過佢只係唱出《Dear Myself》及半首《大笪地》，之後再與眾人唱咗幾句《火熱動感LaLaLa》，光b淪為陪襯。唔少網民都覺得表現好正，不過光實在唱得太小，留言表示「成晚為咗睇尹光啊」、「dear myself, 正」、「有光B先有大大笪地嘅味道」、「因為有光B 所以呢part 最正」、「光B 比中年2 搶咗一半歌」、「還我光b」、「呢首啱錯 尹光首新歌」、「其實dear myself 真係好聽」、「允（尹）光唱半首玩完」、「想睇多啲光b 請佢黎但得幾句solo」及「揾2打6唱 不如揾尹光唱成part 好過」等等。

播《亞洲超星團》片段惹網民困惑
TVB全新偶像選秀節目《亞洲超星團》將於周六（25日）播出，估唔到TVB為咗力sell節目，竟然喺台慶節目加插近10分鐘預先錄製好嘅影片，包括Rain跳舞片段、65位參賽者跳唱《亞洲超星團》主題曲MV及推出蛋糕再大合唱片段；之後台慶現場就有丁子朗、冼靖鋒、文佐匡、黃奕斌及黃星綽分享參賽以來嘅心情。唔少網民都認為《亞洲超星團》與台慶無關，留言話：「關台慶咩事」、「阿rain出得10s」、「錄影就唔好喺呢個時候播啦…」、「呢part搞乜 播片」、「啱啱先開始睇 唔係做台慶咩播呢段嘢黎做乜」、「錄影就咪鬼播啦」、「真係好大陣娘味」、「係咪做緊台慶嫁..」、「浪費airtime」、「台慶播片 咩事」及「其實就係個節目剪出黎」等等。

郭柏妍做空中瑜伽險走光
喺「舞動鼓樂齊飛揚」環節中，一班靚女藝員表演打鼓，而上位小花郭柏妍就喺空中做出一系列嘅高難度瑜伽動作，但背心就不停走位，期間疑似失手差啲「走光」，相當牙煙！事後郭柏妍強調做足安全措施，所以係唔會走光。環節播出後，隨即引起網民熱烈討論，例如「我最期待嘅畫面⋯⋯冇出現」、「Rosita上位了」、「件bra top爭d走位」、「郭柏妍靚到好似另一個層次」及「整個節目最精彩就喺這一幕」等等。

福祿壽表演夠氣氛
「福祿壽」李思捷、王祖藍及阮兆祥久違合體，喺噚晚再一次合體扮鬼扮馬，李思捷扮「拜金」、王祖藍扮「淋作」及阮兆祥扮「林加洞」，喺阮兆祥唱出由Beyond《喜歡你》改編嘅歌曲時，「獎門人」仲感動到喊。整個表演獲得唔少網民喜愛，算係整晚高潮嘅表演，唔少網民都留言認為表現精彩，佢哋扮得似模似樣：「福祿壽全場最精彩, 好鬼正, 希望來近有多做這節目」、「佢扮老人個形態係好似」、「李思捷，王祖藍真係扮野王」、「講真 其實李思捷扮人都幾似」、「最喜歡係林加洞的“總經理”！非常好睇！」、「歌詞堅正」、「除左王祖藍扮林作 其他部分可以話係垃圾級」、「佢捉人嘅神緒捉得好好」、「林作笑到肚痛」、「終於有番啲野睇」、「講真有佢地係到氣氛係好啲既」及「三個都唱得」等等。

15歲趙紫諾贏車 郭佩文奪42萬現金大獎
去到最後嘅大抽獎環節，結果由15歲嘅趙紫諾奪得大獎電動汽車一部，佢喺祝賀TVB台慶時搞笑話自己啱啱15歲；郭珮文就獲得42萬現金大獎，喺郭珮文都未敢相信反應得切時，麥美恩就已經激動衝上前熊抱佢，唔少網民笑話麥美恩識做，例如「識做，夾佢」、「麥美又夾」、「美恩特登走去攬佢」、「麥美又好識做」、「麥美欣（恩）又搞事」及「有勞麥美恩」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！