萬千星輝頒獎典禮2023︳袁志偉獲榮譽大獎 罕有上台致謝「老闆冇干預過新聞部運作」

TVB《萬千星輝頒獎典禮2023》上，主管新聞部嘅助理總經理（新聞及資訊）袁志偉獲「萬千光輝榮譽大獎」。向來TVB新聞部員工絕少參與其他節目，即使去年方東昇以《尋人記II》獲得最佳資訊及專題節目及最佳男主持，負責採訪及主持嘅方都未有上台。

TVB總經理曾志偉負責頒獎俾人稱花哥嘅袁志偉，曾提到「（袁志偉）成日話新聞部係唔攞獎」。袁事前唔知會得獎，加上今年頒獎禮喺澳門舉行，曾志偉話係袁本來唔出席，但係曾呃對方「主席請食飯」同埋「今日要開重要嘅會」令袁志偉嚟澳門。

效力TVB47年嘅袁志偉，上台致詞時話從未諗過新聞部嘅人可以得獎，又將榮譽歸功於成個新聞部。袁志偉強調TVB嘅老闆同管理層，從來冇干預過新聞部運作，亦都冇影響過新聞報道嘅方向同內容。

袁志偉1977年喺浸會學院就讀時加入TVB任職實習記者，畢業後轉為全職記者，並成為TVB新聞部史上最年輕主播。袁志偉記者生涯中遇著中英談判、六四事件、香港及澳門回歸等大事。袁於2000年起出任新聞及公共事務部經理，不再出任主播。2016年袁志偉與人稱「樂小姐」嘅TVB製作資源部總監樂易玲，一同升職成為TVB助理總經理。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！