萬千星輝頒獎典禮2023｜視帝競爭激烈 陳豪沙聲演繹被讚超班 馬國明雙囍臨門？

《萬千星輝頒獎典禮2023》將於2024年1月14日舉行，而各個獎項嘅最後十強名單亦已經喺前日（20日）出爐！劇集《新聞女王》及《破毒強人》喺多個獎項中獲得超過一個提名，氣勢強勁！唔知大家嘅心水有冇入圍最後十強呢？

【Yahoo民意調查】TVB 萬千星輝頒獎典禮2023｜票選你心目中的視帝、視后！

相信大家最關心嘅一定係視帝視后嘅10強入圍名單，喺最佳男主角方面，唔少大熱人選都成功入圍，包括《愛·回家之開心速遞》單立文、《隱形戰隊》陳山聰、《靈戲逼人》張振朗、《破毒強人》陳豪、《破毒強人》蕭正楠、《寵愛Pet Pet》周嘉洛、《你好，我的大夫》何廣沛、《香港人在北京》陳展鵬、《疊影狙擊》黃宗澤及《新聞女王》馬國明。今年視帝競爭同樣激烈，當中以《破毒強人》陳豪及《新聞女王》馬國明嘅呼聲最高。今年視帝寶座競爭激烈，有人隨時2度封帝，亦有人有機會首奪視帝，大家拭目以待喇！

唔少網民紛紛留言支持自己嘅心水視帝，例如「支持馬明」、「支持馬國明拎視帝」、「係偏心既 ⋯ 希望馬明、等他今年可以雙囍臨門」、「振朗加油！大結局的那一幕就夠你赢視帝了！」、「會唔會是張振朗呢，他在靈戲迫人做得唔錯」、「支持陳山聰連莊~」、「演技爐火純青的視帝陳展鵬」、「支持陳豪，加油！」、「陳豪的文華無得輸」、「如果你有睇破毒強人，陳豪嘅演技真係冇可能輸俾其他入圍演員」、「破毒，陳豪做得好！他演技多元化！」、「破毒 陳豪神一般的演技」、「破毒強人 陳豪角色及演繹方法比較特出啲 我選陳豪做視帝」、「陳豪破毒做得好好，我今年投硬佢」及「陳豪嘅文華沙用沙聲 爆青筋嘅演繹已經超曬班，視帝我一定投佢一票。」等等。

睇返過去26屆最佳男主角，有3位男星試過三度封帝，分別係羅嘉良（1997年《難兄難弟》、1998年《天地豪情》及2002年《流金歲月》）、黎耀祥（2009年《巾幗梟雄》、2010年《巾幗梟雄之義海豪情》及2012年《大太監》）及郭晉安（2003年《戇夫成龍》、2005年《阿旺新傳》及2014年《忠奸人》）。曾經二度封帝嘅男星亦有三位，分別係古天樂（1999年《刑事偵緝檔案IV》及2001年《尋秦記》）、鄭嘉顈（2006年《天幕下的戀人》及2011年《怒火街頭》）及王浩信（2017年《踩過界》及2020年《踩過界II》）。而最年輕及最年長得主分別係古天樂以29歲之齡喺1999年憑《刑事偵緝檔案IV》奪得及2008年憑《溏心風暴之家好月圓》榮升視帝嘅62歲夏雨。

至於最佳女主角方面，10強包括《有種好男人》李佳芯、《隱形戰隊》劉佩玥、《靈戲逼人》龔嘉欣、《破毒強人》胡定欣、《寵愛Pet Pet》林夏薇、《你好，我的大夫》蔡思貝、《香港人在北京》吳若希、羅密歐與祝英台》陳茵媺、《新聞女王》佘詩曼及《新聞女王》李施嬅，而今屆嘅大熱視后人選就係《新聞女王》佘詩曼及《新聞女王》李施嬅。

【Yahoo民意調查】TVB 萬千星輝頒獎典禮2023｜票選你心目中的視帝、視后！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！