萬千星輝頒獎典禮2023 《新聞女王》狂掃8獎 佘詩曼陳豪大熱勝出奪視帝視后

TVB《萬千星輝頒獎典禮2023》於澳門圓滿結束，獲最多提名嘅《新聞女王》眾望所歸贏得全晚最多嘅8項大獎，單係女主角「Man姐」佘詩曼就一人橫掃香港、大灣區以及馬來西亞三地最佳女主角，而阿佘亦成為首位三度捧走視后獎座嘅女藝人，威盡全場。

視帝之爭方面，大熱陳豪以《破毒強人》沙聲演出文華一角力壓群雄，16年後再度榮登最佳男主角寶座。TVB安排陳茵媺、黃翠如、單文柔及湯洛雯4位最佳男主角候選人嘅藝人太太上台頒獎，陳茵媺見到老公陳豪得獎即刻激動落淚，陳豪在台上講感言前後都同太太深情擁抱，相當感人。

至於大灣區視帝就由專程現身嘅黃宗澤奪得，係Bosco首次獲得男主角獎項。而馬來西亞視帝就由馬國明奪得，新婚嘅馬明得獎後多謝太太，「我希望佢開心，因為佢開心就旺夫㗎啦」。馬明提到今年取消嘅最受歡迎電視男角色獎時，自嘲「其實我都有個紀錄都冇人破到，因為我係四屆最受歡迎電視男角色—馬國明！」。

喺《新聞女王》演女記者嘅高海寧以大熱姿態得獎，但同劇另一獎項大熱、角逐男配角嘅鄧智堅就輸俾《隱形戰隊》嘅林子善。憑《喜劇之王》入行至今24年嘅子善，上台時激動向父母下跪，講感言講到超時都在所不計，直言「我一生人一次咋」。

全晚賽果四平八穩，同早前外界預測嘅接近，馬貫東及劉穎鏇奪得飛躍進步男、女藝員，而最佳男、女主持就分別由近年擔當大show司儀嘅周奕及瑋麥美恩贏得。而主力音樂發展嘅炎明熹都得到最佳電視歌曲及最具潛質新人2個獎。至於嘉賓方面表現同樣四平八穩，最有睇頭應該係前年喺《下流上車族》演夫妻嘅林敏驄同江美儀。林敏驄繼續「跳掣」演出玩諧音，仲竟然提起已離開TVB嘅鄭裕玲，江立即回應「走咗啦」。林繼續亂噏「走咗？咁快炒人？」，江美儀秒回「炒咗好耐喇」。二人仲拉埋前高層余詠珊落水，「余詠珊呢？走咗幾年啦」。

萬千星輝頒獎典禮2023 獎項得主

最佳劇集：《新聞女王》

最佳女主角：佘詩曼《新聞女王》

最佳男主角：陳豪《破毒強人》

最佳女配角：高海寧《新聞女王》

最佳男配角：林子善《隱形戰隊》

飛躍進步女藝員：劉穎鏇《隱形戰隊》、《靈氣逼人》

飛躍進步男藝員：馬貫東 《黃金萬両》、《破毒強人》、《新聞女王》

最佳女主持：麥美恩

最佳男主持：周奕瑋

最佳資訊及專題節目：《無窮之路Ⅲ—無垠之疆》

最佳綜藝節目：《中年好聲音》

最具潛質新人：鍾柔美、游嘉欣、冼靖峰、古佩玲、炎明熹

最佳電視歌曲：炎明熹 - Crystal Clear《新聞女王》

最佳衣著男藝人獎：馬國明

最佳衣著女藝人獎：佘詩曼

專業精神獎：《東張西望》團隊

萬千光輝榮譽大獎：袁志偉

大灣區最喜愛TVB劇集：《新聞女王》

大灣區最喜愛TVB男主角：黃宗澤《廉政狙擊》

大灣區最喜愛TVB女主角：佘詩曼《新聞女王》

大灣區最喜愛TVB綜藝及資訊節目：《獎門人感謝祭系列》

馬來西亞最喜愛TVB劇集：《隱形戰隊》

馬來西亞最喜愛TVB男主角：馬國明《新聞女王》

馬來西亞最喜愛TVB女主角：佘詩曼《新聞女王》

馬來西亞最喜愛TVB綜藝及資訊節目：《心度遊》(《隨懿深度行》)

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！