《萬千星輝》收視最高29.4點 陳山聰登基「腦霧」 急返家慰妻

陳山聰與江美儀於無綫奮鬥多年,終於做出成績稱帝封后。
陳山聰與江美儀於無綫奮鬥多年,終於做出成績稱帝封后。

無綫《萬千星輝頒獎典禮2022》前晚塵埃落定,出爐視帝陳山聰坦言腦海一片空白,但不忘感激事業上幫助過自己的台前幕後,之後趕返家中與太太咀嘴放閃。

《金宵大廈2》男主角陳山聰在太太Apple送贈的襟花「加持」下開齋,入行30年首奪視帝殊榮,他受訪時表示:「依家個腦仲係一片空白,頒獎嘉賓郭可盈講個『聰』字,我以為係林敏驄!呢10年嚟好多謝監製們咁幫我,呢個獎可以話畀佢哋聽,佢哋嘅幫忙係正確嘅。」

頒獎禮後,他即趕返家中,與太太分享喜悅,又於社交網上載咀嘴照放閃,留言:「多謝老婆支持我,同埋佢個Brooch(襟花),阿仔瞓咗喇,但都要多謝你,I love you!」昨日他受訪時表示:「尋晚好開心,但都好攰,返到屋企老婆煮麵畀我食,食完就瞓咗。」

江美儀豪邁「吹喇叭」

至於江美儀憑《下流上車族》成為出爐視后,談到在台上跟同是亞視出身的陳煒講「爭氣」,她指是公布結果前的彼此約定:「我哋識咗好耐,之前講邊個攞都好,都係爭氣。(林敏驄話你衣着似烏雞。)我唔介意,最緊要靚。(佢話你食事後丸博攞視后。)我事前事後都有食,天氣凍嘛,食維他命C呀。」

頒獎禮完畢後,山聰離開電視城時,與粉絲開香檳兼食蛋糕慶祝,而江美儀除了豪邁「吹喇叭」外,更獲粉絲贈上大盒神秘禮物,原來裏面放滿氣球,期間有男粉絲高呼「美儀世一」。而陳瀅雖失落「視后」,同樣獲粉絲守候支持,更送上親手製作的「最靚女主角」獎項給她。問到失落視后可感失望?她表示:「唔會,好感激愛錫我嘅粉絲,由佢哋送畀我嘅獎,有錢都買唔到。」

另外,《萬千星輝》收視創新高,跨平台直播收視最高29.4點(約189萬觀眾),比去年最高29.1點更高,成為收視之冠。而上周末推出的《顧嘉煇榮休盛典演唱會》,最高收視21.4點,是繼去年台慶後,周末時段收視最高的綜藝節目。至於周一至周五的節目收視保持平穩,《東張西望》最高有23.5點,處境劇《愛.回家之開心速遞》最高收視22.8點,而《有種好男人》最高收視22.4點,持續強勢,《輕.功》結局篇最高20.4點,升0.6點。

陳山聰多謝太太無限支持,令他無後顧之憂。
陳山聰多謝太太無限支持,令他無後顧之憂。
性格豪爽的江美儀拿着香檳「成支隊」。
性格豪爽的江美儀拿着香檳「成支隊」。
陳瀅獲粉絲送上「最靚女主角」獎。
陳瀅獲粉絲送上「最靚女主角」獎。