葉劉：外媒想 23 條盡快立法 屆時會有更多人想來港居住

立法會今日（22 日）辯論致謝行政長官發表施政報告議案，多名議員支持就基本法 23 條立法。2003 年以保安局局長身分推動 23 條立法失敗的新民黨立法會議員葉劉淑儀稱，外國傳媒希望香港盡快完成 23 條立法，屆時會有更多人想來香港居住。

葉劉淑儀發言時稱，時常有外國傳媒向她提起 23 條立法問題，希望有關法例盡量精準立法，亦要解釋精準，切勿引起無謂恐慌。她說，外媒也希望盡快完成 23 條立法：「有外國傳媒同我哋講，佢哋好鍾意香港，有外國傳媒朋友話，根本美國好多大城市都係倒退嘅，去到超市連牙膏都要鎖起，超市都俾人打荷包或者打劫，香港實在係一個好安全、佢哋好鍾意嘅地方。香港越快完成嗰啲國安大案嘅檢控，甚至完成 23 條立法，恢復一個平靜和諧嘅香港，更多人想來香港居住。」

「我個女唔係 gay 嘅」

她又提及香港人權指數排名的問題，認為是國際社會對香港的誤會，因為香港已有反歧視法例，只是未有針對歧視性少數的法例。然後她提起自己早前出席同樂運動會的事件，並澄清其女兒並非同性戀者：「眾所周知，我去支持同樂運動會，為咗向國際社會表示我哋香港包容、共融嘅社會，而唔係線上線下有啲傳言，話我去支持同樂會係因為我個女係 gay 嘅。我想向各位聲明，我個女唔係 gay 嘅。」

葉劉續說：「就算佢係 gay，我都唔會覺得係好慚愧或者尷尬，因為事實上無論從我求學到我就業嘅數十年，我有好多朋友都係個性向同我唔同，佢哋都係好善良好有才華嘅人士，我完全睇唔到點解要歧視佢哋。」

包容性小眾可堵國安漏洞

葉劉更進一步說，包容性小眾對國家安全有着正面作用：「或者我講少少歷史，點解英國將同性戀去刑事化同埋今天非常主將包容。喺英治嘅時代，我都有了解當時港英政府將同性行為推行去刑事化，就係一個國安嘅問題，因為如果同性嘅行為係一個罪行，好多公職人員會受到威脅，會受到 blackmail。」

她舉出電腦天才 Alan Turing 作例子，「有個電影叫《Imitation Game》(解碼遊戲），講過佢生平嘅，就係因為佢係一個性少數人士，佢唔敢公開而面臨檢控，呢個電腦天才係自殺嘅」。她認為，西方政府將同性行為去刑事化，是不想性向問題成為國家安全漏洞，令公職人員受人恐嚇威脅。

葉劉並指出，無論在創意、法律、金融及科技等行業，很多優秀人才均屬性少數人士，「如果我哋唔向國際社會表示我哋包容，比亞洲好多地區都更加包容呢，我哋更加難吸納呢啲人才」。